Сербид 14-өөс дээш насныхан эрүүгийн хариуцлагад татагдах хуультай. Харин энэ насны босгыг бууруулж, 12 наснаас эхлэн эрүүгийн хариуцлагад татдаг болгох асуудлыг хэлэлцэх үүргийг Сербийн Ерөнхийлөгч Александр Вучич Засгийн газартаа өгчээ. 

Эрүүгийн хариуцлагад татагдах насыг 12 болгон бууруулахын зэрэгцээ  дунд болон ахлах ангийн сурагчдыг хар тамхи хэрэглэсэн эсэхийг шалгах шинжилгээг албан журмаар авдаг болохыг Сербийн Ерөнхийлөгч Вучич уриалсан байна. 

Тэрбээр ийм санал, уриалга гаргах болсон нь лхагва гарагт Сербид болсон аймшигт хэрэгтэй холбоотой юм. Лхагва гарагт Сербийн нийслэл дэх дунд сургуульд өсвөр насны хүү гал нээж, найман хүүхэд, сургуулийн хамгаалагчийг хөнөөж, зургаан хүүхэд, нэг багшийг шархдуулсан байна. Хэргийг үйлдсэн өсвөр насны хүүхэд 2009 онд төрсөн, аавынхаа буугаар гал нээсэн нь тогтоогджээ. Тэрбээр одоо сэтгэцийн эмнэлгийн тусгай хэсэгт байгаа бөгөөд хэрэг хүлээх насанд хүрээгүй тул эцэг, эхийг нь 48 цагийн хугацаатай баривчлан саатуулсан байна. 

Г.Бямбасүрэн