Туркийн Засгийн газар хоёрдугаар сард болсон газар хөдлөлтийн үеэр Туркэд ажилласан Мексикийн аврагчдад герман овчаркийн гөлөг бэлэглэжээ. Энэ талаар МИР24 мэдээлсэн байна. 

Гөлөг хэдийнэ Мехикод хүрсэн гэнэ. Хоёрдугаар сард болсон газар хөдлөлтийн үеэр эрэн хайх, аврах ажиллагаанд оролцож байгаа амиа алдсан Мексикийн Протео дуудлагат нохойнд хүндэтгэл үзүүлж ийнхүү гөлөг бэлэглэжээ. 

Туркийн Засгийн газраас өгсөн энэ бэлгийг Мексикийн Батлан хамгаалах яамны ажилтнууд баяртайгаар хүлээн авсан байна. 

"Энэ бол маш том хариуцлага. Би гөлгийг сургаж, шилдэг аврагч нохой болгохыг хичээнэ. Туркийн ард түмэнд ихээхэн талархаж байна, хүнд цаг үед тэдэнд тусласан нь миний хувьд нэр төрийн хэрэг" хэмээн нохой сургагч Хуан Карлос Вийеда сэтгүүлчдэд сэтгэгдэлэ хуваалцжээ. 

Эргэн сануулахад, хоёрдугаар сарын зургаанд Турк болон хөрш Сири улсад хоёр хүчтэй газар хөдлөлт болсон юм. Энэ газар хөдлөлтийн улмаас 50 мянга гаруй хүн амиа алдаж, олон мянган хүн орох оронгүй болсон. Хоёрдугаар сард болсон энэ газар хөдлөлтийг Туркийн орчин үеийн түүхэн дэх хамгийн хүчтэй газар хөдлөлтөд тооцож байгаа юм.

Г.Бямбасүрэн