Австралийн засгийн газар электрон тамхи импортлох, жижиглэн худалдааны дэлгүүрүүдэд тэдгээрийг зарж борлуулахыг зогсоох шийдвэр гаргажээ. Энэ талаар МИР24 мэдээлсэн байна. 

Түүнчлэн Австралид электрон тамхийг эм бэлдмэл шиг битүү саванд хийж зарах, нэг удаагийн цахилгаан тамхийг хориглохоор төлөвлөж байгаа аж. Австралийн Эрүүл мэндийн сайд Марк Батлерын өгүүлснээр, электрон тамхийг никотин бүхий утаат тамхийг орлуулах аюулгүй хэрэгсэл гэж анхандаа үзэж байсан ч энэ нь шинээр тамхинд орох хүмүүсийн тоог нэмэгдүүлж байгаа гэнэ.

"Электрон тамхи хэрэглэх шинэ аюул занал гарч ирснээр тамхидалттай хийх бидний тэмцлийн үр дүн үгүй болж байна. Энэ хэрэгслийг тамхи татах зуршлаа хаяхад туслах эмчилгээний зориулалттай гэж сурталчилж байсан. Электрон тамхи зугаацах зориулалтгүй, тэр дундаа хүүхдүүд татчихна гэж хэн ч таамаглаж байгаагүй. Гэвч ийм зүйл болчихлоо. Зургаан өсвөр настан тутмын нэг нь электрон тамхи татаж үзсэн байна. Гэтэл ахмад настнуудын дунд 70 хүн тутмын нэг нь л үүнийг сонгож байна. Залуус энэ электрон тамхийг ямар ч дэлгүүрээс чөлөөтэй худалдан аавх боломжтой болсон, эдгээрийг шоколад, чихэртэй хамт зэрэгцүүлэн тавиад л зарж байна" хэмээн Австралийн Эрүүл мэндийн сайд мэдэгджээ.

Электрон тамхийг тамхинаас гаргах нэг арга гэж сурталчилдаг ч дэлхий даяар, тэр дундаа манай улсад ч хүүхдүүдийн дунд өргөн тархаад байгаа юм. Өсвөр настнууд ихээр үйлчлүүлдэг сүлжээ дэлгүүрүүдэд кассны орчимд ил харагдах байдлаар электрон тамхийг байрлуулан худалдаалдаг нь хүүхдүүд худалдан авахад улам нөлөөлж байна. Электрон тамхи нь уушги гэмтээдэг 200 гаруй химийн бодис агуулдаг, тэдгээрийн зарим нь хумсны лак арилгах шингэн, зэрлэг ургамал устгах бэлдмэлд ашиглагддаг бодисууд ч байдаг аж.

Г.Бямбасүрэн