АНУ руу зорих гадаад улс орны иргэд коронавирусийн халдвараас сэргийлэх вакцинд хамрагдсан байх шаардлагыг Америкийн эрх баригчид тавьж байсан. Энэ журмыг тавдугаар сарын 11-ний өдрөөс эхлэн цуцлахаар болжээ. 

Цагаан ордны мэдээлснээр, тавдугаар сарын 11-ний өдрөөс эхлэн гадаадын жуулчдаас вакцинд хамрагдсан байхыг шаардах журмыг цуцлахаар болсон байна. Түүнчлэн төрийн албан хаагчид, эмнэлгийн ажилтнууд коронавирусийн халдвараа сэргийлэх вакцинд зайлшгүй хамрагдах журам ч цуцлагдаж байгаа аж. 

Тавдугаар сарын 11-ний өдөр АНУ-д эрүүл мэндийн салбарт зарласан онц байдлын хугацаа дуусах юм байна. Тус улсад 2020 оны гуравдугаар сард цар тахлын улмаас онц байдал тогтоож, харин энэ оны тавдугаар сарын 11-ний өдрөөс онц байдлыг цуцлах тушаал 2023 оны дөрөвдүгээр сарын 11-нд гарсан юм. Цар тахал дэгдсэнээс хойш АНУ-д 104 сая орчим хүн халдвар авч, 1,1 сая хүн коронавирусийн халдварын улмаас нас баржээ.

Г.Бямбасүрэн