Суданы Зэвсэгт хүчин тус улсад зарласан эвлэрлийн хугацааг дахин 72 цагаар сунгахаар тохиролцжээ. Энэ шийдвэрийг Саудын Араб болон АНУ-ын зүгээс дэмжлэг үзүүлсний ачаар гаргасан гэж Суданы арми Фейсбүүк дэх хуудсандаа бичсэн байна. 

Бусад орнуудын иргэдийг Суданаас  нүүлгэн шилжүүлэх, Суданы иргэдэд хүмүүнлэгийн тусламж үзүүлэхэд тохиромжтой нөхцөл байдлыг бий болгох үүднээс ийнхүү эвлэрлийн хугацааг сунгажээ. 

Эргэн сануулахад, Суданы арми болон тусгай хүчний хоорондын мөргөлдөөн дөрөвдүгээр сарын 15-ны өдөр эхэлсэн юм. Суданы эрх мэдлийг иргэний засгийн газарт шилжүүлэх явцын хүрээнд тусгай хүчнийхэн армид нэгдэх ёстой байсан бөгөөд энэ үеэр талуудын хооронд зөрчилдөөн гарч, тэр дундаа хоёр хүчний тэргүүлэгчийн эрх мэдлийн төлөөх тэмцлийн улмаас энэ зэвсэгт сөргөлдөөн эхэлжээ. Мөргөлдөөний улмаас Суданд 600 гаруй хүн амиа алдсан юм. Улмаар АНУ болон Саудын Арабын зуучлалтайгаар талууд дөрөвдүгээр сарын 25-ны өдрөөс эхлэн 72 цагийн хугацаагаар эвлэрэл зарлаж байсан ч буун дуу гарсаар байгааг хэвлэлүүд мэдээлж байв. 

Г.Бямбасүрэн