Москва хотын тохижилт үйлчилгээний салбарт ажиллаж буй, Төв Азийн орнуудаас ирсэн цагаачдыг Украинд дайтах "сайн дурын" цэргээр элсүүлэхээр Батлан хамгаалах яам шийдсэн гэж хүний эрхийг хамгаалах байгууллагын төлөөлөгч The Moscow Times сонинд ярьжээ. 

Хүний эрхийн хамгаалагчийн өгүүлснээр, улсын төсвийн байгууллага болох "Жилищник" хот тохижилтын ажилчдыг цэрэгт элсүүлэх ажилд идэвхийлэн туслаж байгаа гэнэ. Дөрөвдүгээр сарын 20-ны өдөр Москвагийн Хойд тойргийн гудамж цэвэрлэгчдийг цуглуулан, Батлан хамгаалах яамны харьяа хувийн цэргийн компанийн төлөөлөгчидтэй уулзуулсан гэнэ.

Энэ уулзалтад оролцсон нэгэн ажилчны өгүүлснээр, энэ арга хэмжээнд 100 гаруй цэвэрлэгч оролцсон бөгөөд тэднийг дайнд оролцохоор бүртгүүлвэл иргэншил олгоно хэмээн амласан аж. Уулзалтын үеэр хувийн цэргийн компанийн төлөөлөгчид "Оросын арми" гэсэн бичигтэй хуудас, шаардлагатай баримт бичгийн жагсалтыг өгсөн байна. Дайтахыг хүсээгүй хүмүүсийг эзлэгдсэн нутаг дэвсгэрт ажилд орохыг урьдаг, гэвч ингэж явсан хүмүүсийг эргүүлээд Орос руу оруулдаггүй гэж хүний эрхийг хамгаалагч өгүүлжээ.

Энд дуулгахад, хөлсний цэрэгт элсүүлэх ажил 2022 оны намраас эрс идэвхжсэн юм. Хараат бус хэвлэлүүдийн мэдээлснээр, "Вагнер" компани олон нийтийн сүлжээнд зар байршуулан, цэрэг элсүүлсээр иржээ. Ийм зар тавихдаа "хамгаалагч ажилд авна" гэж бичих бөгөөд хамгаалагчийн орон тоонд ажиллахаар утсаар холбогдсон хүмүүст "хамгаалагчийн орон тоо дүүрсэн" гэж хариулаад, үүний оронд фронт руу явахыг санал болгодог байна. 

Г.Бямбасүрэн