Орос Украинд дайн өдүүлсний дараа гадаадын компаниуд олноороо энэ улсын зах зээлийг орхисон. Харин Оросоос хараахан гараагүй байгаа гадаадын компаниуд өмч хөрөнгөө алдах бодит аюултай тулгарчээ. 

The Moscow Times сонины мэдээлснээр, Оросын эрх баригчид тус улсад үлдсэн гадаадын компаниудын хөрөнгийг хурааж эхэлсэн байна. Тодруулбал, ОХУ-ын Ерөнхийлөгч Владимир Путин Германы Uniper болон Финландын Fortum компанийн Орос охин компаниудад байх хөрөнгийн хувийг Оросын төрийн өмчийн газарт шилжүүлэх зарлигийг дөрөвдүгээр сарын 25-ны өдөр гаргажээ.

Энэ зарлигт өгүүлснээр, дулааны цахилгаан станцуудыг удирддаг "Юнипро" Хувьцаат нийгэмлэгийн хувьцааны 83,73 хувь, "Фортум" компанийн 98,23 хувийг "түр хугацаанд төрийн мэдэлд" оруулахаар болсон байна. Гадаадын компанийн хөрөнгийг төрд авах болсон энэ шийдвэр нь АНУ болон түүний холбоотнууд "нөхөрсөг бус олон улсын эрхзүйг зөрчсөн үйлдэл гаргасны хариу" хэмээн зарлигт онцолжээ. 

Путиний энэхүү зарлиг нь хилийн чанад дахь ОХУ-ын өмч хөрөнгийг хураах, царцаах, өмчийн эрхийг хязгаарлах үйлдэл гаргасан тохиолдолд "нөхөрсөг бус орнууд"-тай холбоотой компаниудын аливаа хөрөнгийг хураах боломжийг олгож байгаа аж.

Г.Бямбасүрэн