Польшийн Ерөнхийлөгч Анджей Дуда албан ёсны айлчлал хийхээр гэргийн хамт даваа гарагт Улаанбаатар хотноо газардсан. Энэ нь сүүлийн 10 жилийн хугацаанд Польшийн төрийн тэргүүн Монголд айлчилж буй анхны тохиолдол юм. Одоогоос 10 жилийн өмнө, 2013 онд Ерөнхийлөгч Бронислав Коморовски Монгол Улсад айлчилж байв. 

Айлчлалын талаар Польшийн Ерөнхийлөгчийн захиргааны тэргүүн Марчин Пшидач "Польшийн радио"-д мэдээлэл өгөхдөө Украины эсрэг Оросын түрэмгийлэлд хандах Польшийн байр суурийг Анджей Дуда илэрхийлнэ хэмээн онцолсон байна. "Монгол зэрэг бүхий л орны геополитикийн нөхцөл, сонголтод Ерөнхийлөгч ихээхэн хүндэтгэлтэй ханддаг. Мөн үүний зэрэгцээ, тэрбээр манай байр суурийг илэрхийлнэ. Энэ байр суурийг хүлээн авч, ойлгоно гэж бид найдаж байна" хэмээн Марчин Пшидач мэдэгджээ.

Анджей Дудагийн айлчлал нь голчлон хоёр талын эдийн засаг, соёл, боловсролын харилцаанд чиглэгдэх аж. Айлчлалын үеэр хоёр орны төрийн тэргүүн Польш, Монголын бизнес форумыг нээх юм байна. 

"Энэ хамтын ажиллагаа нь түүхий эдээр хязгаарлагдахгүй, Польшийн туршлага дээр үндэслэсэн арга технологийг агуулах ёстой гэдгийг бид Монголын түншүүддээ ойлгуулах хүсэлтэй байна. Хоёр дахь чухал салбар нь хүнсний үйлдвэрлэл" хэмээн Пшидач өгүүлжээ.

Түүнчлэн айлчлалын үеэр Ерөнхийлөгч Дуда Улаанбаатар хотод Польшийн Элчин сайдын яамыг нээж, Монгол Улсын Их Сургуульд үг хэлэх бөгөөд энэ үеэр түүнд хүндэт докторын цол олгоно гэж "Польшийн радио" мэдээлжээ.

Г.Бямбасүрэн