Өнгөрсөн долоо хоногт Хятадын нийслэл Бээжин хотод байх нэгэн эмнэлэгт гал гарсны улмаас олон ахмад настан амиа алдсан хэрэг гарсан. Шалгалтын явцад энэ эмнэлэг хууль зөрчсөн нь тогтоогджээ. 

Тодруулбал, гал гарсан эмнэлг нь ахмадын асрах газрыг хууль бусаар ажиллуулж байсан аж. Бээжингийн ахмад настнуудыг асрах Фуканшоу төв 2019 оноос эхлэн Чанфэн эмнэлэгтэй хамтран ажиллах болжээ. Өндөр настнуудыг Чанфэн эмнэлэгт байрлуулж, харин Фуканшоу төвд үйлчлүүлэгчдийг татах сурталчилгааны арга хэмжээ явуулдаг байжээ. 

Ийнхүү хамтран ажиллахдаа иргэний хэрэг хариуцсан зохих хэлтэст бүртгүүлээгүйн улмаас Хятад дахь ахмадын асрах байранд тавигдах барилга, галын аюулгүй байдал болон хүнсний аюулгүй байдлын шалгалтууд хийгдээгүй байна. Тиймээс энэ хоёр байгууллагыг хууль зөрчсөн хэмээн буруутгаж байгаа аж. 

Эргэн сануулахад, дөрөвдүгээр сарын 18-ны өдөр Чанфэн эмнэлэгт гарсан галын улмаас 29 хүн амиа алдсан бөгөөд эдгээр хүмүүс бүгд 70 -аас дээш насныхан байжээ. Энэ хэргийн улмаас эмнэлгийн ерөнхий эмч  зэрэг нийт 12 хүнийг саатуулсан байна. Галын шалтгааныг 60 хоногийн дотор тогтоохоор ажиллаж байгаа аж. 

Г.Бямбасүрэн