Үндэсний аудитын газраас Цемент шохой ТӨХК-ийн 2022 оны санхүүгийн тайланд аудит хийж, тайлан гаргажээ. Аудитын байгууллага Цемент шохой ТӨХК санхүүгийн зөрчилтэйгээс гадна Төрийн хэмнэлтийн тухай хуулийг хэрэгжүүлээгүй, үр хэмжээний үргүй зардал гаргасныг тогтоосон байна.

Тус байгууллага 2022 онд нийт 58 сая төгрөгийн үргүй зардал гарсан байна. Тухайлбал:

-Цемент Шохой ХК-ийн гүйцэтгэх захирлын хувийн зардалд 6.4 сая төгрөг зарцуулсан

-Улаанбаатар оффисын үйл ажиллагаанд батлагдсан төлөвлөгөөнд тусгаагүй 27 сая төгрөгийг зарцуулж, хоол, ундаа, кофены баримт хавсаргасан

-Хайрхан тахисан, бумбын баярт 5.9 сая төгрөг зарцуулсан

-Томилолтын зардлыг Сангийн сайдын тушаалаар баталсан хэмжээнээс хэтрүүлж, Хөтөлөөс-Улаанбаатар гэсэн маршрутаар томилолтын зардалд 7.7 сая олгосон

-Ажилчдын хор саармагжуулах гэсэн гүйлгээний утгатай 11 сая төгрөгийг барилгын компанид шилжүүлсэн зэрэг нийт 58 сая төгрөгийг үр ашиггүй зарцуулсныг аудитын байгууллага тогтоожээ.

Тиймээс холбогдох хуулиудыг зөрчиж, үр ашиггүй зарцуулсан хөрөнгийг буруу шийдвэр гаргасан албан тушаалтнаар нөхөн төлүүлэх төлбөрийн акт тавьсан байна.

Мөн Цемент шохой ТӨХК-ийн охин компани болох Хөтөл Энержи Дулаан ХХК-ийн гүйцэтгэх захирал 2022 онд томилолтын зардалд 2.6 сая илүү зарцуулсан, урлагийн бага наадамд 0.9 сая, улсын баяр наадамд 0.8 сая, барилгачдын баярт 1.8 сая, нийт 6.1 сая төгрөгийг үргүй зарцуулжээ. Энэ нь цахим И-баримтаар нотлогдоогүй байна.

Б.Хэрлэн