Иран улс хөдөлгөөнт тэнгисийн тээврийн хэрэгсэл устгах, дууны хурднаас найм дахин хурдтай нисэх чадвартай дуунаас хэт хурдан пуужин бүтээснээ зарлажээ. Fars агентлагийн мэдээлснээр, Тегеранд болсон арга хэмжээний үеэр Ираны Зэвсэгт хүчний Ерөнхий штабын дарга Мухаммед Бакыри энэ талаар мэдэгдсэн байна. 

Иран улс дуунаас хэт хурдан пуужинг амжилттай туршсан гэж Мухаммед Бакыри мэдэгдээд энэ төрлийн пуужинтай гурван орны нэг нь Иран боллоо гэж онцолжээ. Түүний өгүүлснээр, баллистик пуужингийн хурд нь дууны хурднаас найм дахин их, тусгал нь 1500 км аж. Зэвсэглэлдээ ийм пуужинтай болсноор 1000 хүртэлх километрийн радиуст тэнгист аюулгүй байдлын бүс байгуулах боломжийг өгнө гэж Мухаммед Бакыри мэдэгджээ.

Гэхдээ тэрбээр ийм пуужингуудыг хэзээ, хаана туршсан талаар мэдээлэл өгөөгүй байна. Өмнө нь, 2022 оны 11 дүгээр сарын 10-ны өдөр Ираны Исламын хувьсгалын харуулын корпусын Агаарын цэргийн хүчний командлагч генерал Эмир Али Гажизаде Иран шинэ баллистик пуужин боловсруулсан хэмээн мэдэгдэж байв.

Г.Бямбасүрэн