Германы төрийн албан хаагчид цалин нэмэхийг шаардан, эсэргүүцлийн жагсаал зохион байгуулжээ. Гуравдугаар сарын зургааны өдөр болсон энэ үйл явдлын талаар Германы DW агентлаг мэдээлсэн байна.

Эх сурвалжийн мэдээлснээр, төрийн албан хаагчид бамбар, утаа гаргах хэрэгсэл болон лоозон барин алхаж, цалин нэмэхийг шаардсан бөгөөд энэ шаардлагыг биелүүлэхгүй бол Берлин хотод хоёр өдрийн ажил хаялт зарлана хэмээн мэдэгджээ. Энэ ажил хаялтад 7000 орчим хүн нэгдэж болзошгүй, тэр дундаа ус цэвэршүүлэх, ус дамжуулах станцууд зэрэг нэн чухал байгууллагуудын ажилтнууд ч нэгдэнэ гэж анхааруулсан байна.

Энд дуулгахад, Германд сүүлийн үед энэ төрлийн эсэргүүцлийн арга хэмжээ тасралтгүй зохион байгуулагдаж байгаа юм. Хоёрдугаар сарын дунд үеэр гэхэд л Германы долоон нисэх буудлын ажилтнууд ажил хаяж, 2300 нислэгийг цуцлаж байлаа. Нисэхийн салбарынхан цалин нэмэхийг шаардан ийнхүү ажил хаясны улмаас 300 мянган хүн товлосон цагтаа аялалд гарч чадаагүй байна.

Г.Бямбасүрэн