Жижиг дунд үйлдвэрийг хөгжүүлэх сан Капитал банкнаас 42 тэрбум төгрөгөө авч чадахгүй, асуудлыг шүүхийн журмаар шийдэхээр болжээ. Капитал банкны дампууралтай зэрэгцэн төрийн их хэмжээний мөнгө "сураг" тасарсан. Үүнд нэг хэсэг төрийн өндөр албан тушаалтнуудыг гурван хувийн хүүтэй зээлээр "угжсан" ЖДҮХ сан юм. 

Өнөөдөр тус сан Капитал банкнаас 42 тэрбум төгрөгийн авлагатай. /2019 оны дөрөвдүгээр сарын 8-нд Монголбанкны Ерөнхийлөгчийн тушаалаар "Капитал" банкыг татан буулгах шийдвэр гаргаж, банкны эрх хүлээн авагчаар Т.Дэлгэрхүүг томилсон/

Сануулахад, одоогоос таван жилийн өмнө  “Капитал” банк жилийн 7 хувийн хүүтэй, 48 тэрбум төгрөгийн зээлийг ЖДҮ-ийг хөгжүүлэх сангаас  авсан тухай баримт дэлгэгдэж байв. Тухайн үед  ЖДҮХС-гийн зээлийг банкаар дамжуулан жилийн 9 хувийн хүүтэй олгодог байсан нь олон нийтэд дэлгэгдсэн.

Тэгвэл ЖДҮХС-ийнхан Капитал банкнаас 42 тэрбум төгрөгөө авахын тулд ЗӨВЛӨХ хайж эхэлсэн байна. ЖДҮ-ийн газрын даргын тушаалаар Үнэлгээний хороо байгуулжээ. Уг үнэлгээний хороо нь ЖДҮ газрын 2023 оны худалдан авах ажиллагааны төлөвлөгөөнд тусгагдсан ЖДҮХС-аас Капитал банкаар дамжуулан олгосон зөрчилтэй дэд зээлдэгчдийн төлбөрийг санд төвлөрүүлэх шийдвэр гаргуулах зөвлөх үйлчилгээний ажлын гүйцэтгэгчийн сонгон шалгаруулах юм. Зөвлөх үйлчилгээ үйлчилгээ үзүүлэгч нь 80 сая төгрөгийн хөлс авч, 42 тэрбум төгрөгийн ЖДҮХС-ийн дансанд төвлөрүүлэх үүрэг хүлээх аж. Ийнхүү төр их хэмжээний мөнгөө дампуурсан банкнаас олж авахын тулд хариуцсан сангийнхан биш тусгай ЗӨВЛӨГЧ хайж эхэллээ. Асуудал хууль шүүхийн байгууллагаар шийдэгдэхэд ЖДҮХС-ийнхан жульдаж, тусгайлан зөвлөх үйлчилгээ авахаар болж байгаа нь энэ аж. 

“Капитал” банк ЖДҮХС-гаас 48 тэрбумыг авсан баримт

П.ГОО