Даваа гарагт Туркийн зүүн өмнөд хэсэгт хүчтэй газар хөдлөлт болж, олон  мянган барилга нурсны улмаас хүмүүс олноор амиа алдаж, 15 мянга гаруй хүн гэмтэж бэртсэн байна. Эмнэлгийн ачаалал хэтэрч, газар хөдлөлтийн бүсэд байх эмнэлгүүд өвчтөнөөр дүүрсэн талаар Анадолу агентлаг мэдээлжээ. 

Анадолу агентлагийн мэдээлснээр, гэмтэж бэртсэн хүмүүсийг эмчлэхэд цусны нөөц шаардлагатай байгаа тул Туркийн оршин суугчид нутаг нэгтнүүддээ туслаж цусаа өгөхөөр эмнэлгүүдэд урт дараалал үүсгэн зогсож байгаа аж.

Эх сурвалжийн мэдээлснээр, Эрзурум, Эрзинжан, Агра, Ардахан, Карс мужууд дахь Улаан хавирган сар нийгэмлэгийн цус цуглуулах төв дээр ч хүмүүс олноороо дугаарлажээ.

Үүний зэрэгцээ Туркийн Үндэсний батлан хамгаалах яамны энгийн болон цэргийн мэргэжилтнүүд тус улсын 10 мужид цус хандивлах аянд нэгдсэн байна.

Г.Бямбасүрэн