Сингапурын оршин суугч эр өөртэй нь болзохыг хүсээгүй бүсгүйн эсрэг шүүхэд нэхэмжлэл гаргажээ. Тэрбээр энэ нэхэмжлэлдээ бүсгүйгээс гурван сая доллар нэхэмжилж байгаагаа бичсэн гэж The Strait Times сонин мэдээлсэн байна.

Тодруулбал, К.Каушиган гэх эр Нора Тан хэмээх бүсгүйд хайраа илчлэхэд бүсгүй түүнийг "хамгийн сайн найз нь" хэмээн хариулж, өөртэй нь амрагийн холбоотой байхыг хүсээгүй тул бүсгүйгээс "сэтгэл санааны хохирол" болгон гурван сая доллар нэхэмжилжээ. Тэд 2016 онд танилцаж, нөхөрлөсөн гэнэ. Аажмаар Каушиган бүсгүйд дурлаж, харин Нора Тан түүнд зөвхөн найзын ёсоор л хандаж байсан аж. 

Үүнийх нь төлөө шүүхэд өгөхөөр төлөвлөж байтал Нора түүнтэй хамт сэтгэлзүйчийн зөвлөгөөнд очихыг зөвшөөрсөн тул нэхэмжлэл гаргахаа хойшлуулж байжээ. Харин энэ зөвлөгөөний үеэр Нора түүнд "хэцүү байдалд байгаагаа" хэлэхэд залуу эр эсвэл өөртэй нь болз, эсвэл шүүхэд хандана хэмээн тулгасан гэнэ.Ингээд сэтгэлзүйчийн зөвлөгөө жил хагас үргэлжилж, зөвлөгөө дуусахад Каушиганыг бүсгүй хаяжээ. Ингээд "нэр хүндэд нь хохирол учруулсан", "сэтгэлзүйн гэмтэл, депресс учруулсан" хэмээн гурван сая долларын нэхэмжлэлийг Дээд шүүхэд гаргасан байна. 

Энэ шүүх хурлын сонсгол хоёрдугаар сарын 10-ны өдөр болохоор товлогджээ. Харин шүүхэд нэхэмжлэгчээр татагдсан Нора Тан өөрөөс нь салахгүй байгаа "шүтэн бишрэгчээсээ" хамгаалуулахын тулд цагдаад хандаж, хамгаалалт авсны дээр сөрөг нэхэмжлэл гаргахын тулд өмгөөлөгч хөлсөлсөн гэнэ. 

Г.Бямбасүрэн