Их Британид сүүлийн арван жилд тохиож байгаагүй өргөн цар хүрээтэй ажил хаялт үргэлжилж байна. Үндэсний хэмжээний энэ ажил хаялтад хагас сая ажилтан нэгдсэн гэж Британийн Үйлдвэрчний эвлэлүүд мэдэгдсэнийг France Press агентлаг дамжуулжээ. 

Иргэд олноор ажил ахях болсон нь инфляцийн өсөлттэй холбоотой бөгөөд эсэргүүцэлд оролцогчид хөдөлмөрийн нөхцөлийг сайжруулах, цалин нэмэхийг шаардаж байгаа аж. 

"Багш нарын цалинг нэмэх ёстой. Боловсролд ихээхэн санхүүжилт хийх ёстой гэж би бодож байна. Хүүхдүүдэд сайн боловсрол олгохын тулд хоёр багшаас биш 20 багшаас сонгодог байх ёстой. Үүний тулд боловсон хүчин их, өрсөлдөөн ч их байх ёстой юм" хэмээн жагсаалд оролцогч, боловсролын байгууллагын төлөөлөл сэтгүүлчдэд ярьжээ. 

Их Британид ажил хаялтын улмаас олон мянган дунд сургуулийг хааж, их дээд сургуулиудад лекц тасалдаж, нийтийн тээврийн үйл ажиллагаа доголдон, олон нислэг цуцлагдаж, хойшлон, төмөр замын хөдөлгөөн хэсэгчлэн тасалдсан байна. 

Г.Бямбасүрэн