Америкийн Нью-Мексико мужийн Прокурорын газар Холливудын жүжигчин Алек Болдуиныг санамсаргүйгээр хүний амь хөнөөсөн хэрэгт албан ёсоор буруутгажээ. Болдуин 2021 оны 10 дугаар сарын 21-ний өдөр "Rust" киноны зураг авалтын үеэр зураглаач Галина Хатчинсийг буудсан юм. 

Болдуинаас гадна зураг авалтын талбай дээр зэвсэг, сум хэрэгслийг хариуцаж байсан Ханна Гутьерес-Рид санамсаргүйгээр хүний амь хөнөөсөн хэрэгт буруутгагджээ. 2021 оны намар кино зураг авалтын үеэр Болдуин буудах хэсгийн зургийг авахуулах үеэр санамсаргүйгээр Хатчинсийг буудсан бөгөөд тухайн үед хоосон байх ёстой байсан гар буунд байлдааны сум байсныг жүжигчин мэдээгүй аж. 

Прокурорын дүгнэлтийг шүүх баталж, Болдуин болон Гутьерес-Рид нарыг буруутайд тооцвол тэд 18 сар хоригдож, 5000 долларын торгууль төлөх юм. Гэхдээ энэ хэрэгт галт зэвсэг хамааралтай тул хоригдох ял тав хүртэлх жилээр нэмэгдэж болзошгүй гэж CNN агентлаг мэдээлжээ.

Зураг авалтын талбай дээрх энэ хэрэг болсноос жилийн дараа буюу 2022 оны 11 дүгээр сард Алек Болдуин "Rust" киноны зураг авалтын багийг шүүхэд өгсөн юм. Өөрт нь зэвсэг аюулгүй гэж хэлэн гар бууг өгсөн Гутьерес-Рид, туслах найруулагч Дейв Холлс нарын хүмүүс энэ эмгэнэлт хэрэгт буруутай гэж Болдуин нэхэмжлэлдээ өгүүлсэн байна.

"Хэргийг хариуцагчид нь зураг авалтын талбай дээр аюулгүй байдлыг хангах үүрэгтэй мэргэжилтнүүд. Болдуин зэрэг зураг авалтын бүхий л оролцогчид тэднээс гагцхүү үүнийг хүлээж, тэдэнд итгэж байсан" хэмээн шүүхэд гаргасан нэхэмжлэлд өгүүлжээ.

Харин Гутьерес-Ридийн өмгөөлөгч Жейсон Боулз "Чухамхүү Болдуин Галинаг буудсан, энэ бол түүний л алдаа" хэмээн мэдэгдэж байв.

Амиа алдсан зураглаач Хатчинсийн гэр бүл анх Болдуиныг зураг авалтдаа сайтар бэлдээгүй хэмээн буруутгаж түүний эсрэг шүүхэд хандаж байлаа. Харин дараа нь нэхэмжлэлээ эргүүлэн татаж, "Галинагийн үхэл аймшигтай золгүй тохиолдол байсан гэж бид үзэж байна" хэмээн зураглаачийн нөхөр Мэтью Хатчинс мэдэгдэж байв.

Г.Бямбасүрэн