2023 оны зун гэхэд Украин Крымийг цэргийн замаар эргүүлэн авахаар төлөвлөж байгаа гэнэ. Энэ талаар Украины Батлан хамгаалахын яамны Тагнуулын ерөнхий газрын дарга Кирилл Буданов "Вашингтон пост" сонинд өгсөн ярилцлагадаа өгүүлжээ. 

Энэ зун гэхэд хойгийг "гэрт нь эргүүлэн авахын тулд" Украины Зэвсэгт хүчин бүхнийг хийх ёстой хэмээн Буданов өгүүлээд "Крымийг бидэнд буцаан өгнө. Энэ бүхэн 2014 онд Крымд эхэлсэн, тэнд бүх зүйл дуусна" хэмээн онцолжээ. 

Мөн Крымийг чөлөөлснөөр Владимир Путин цөмийн зэвсэг хэрэглэж болзошгүй гэсэн хувилбарт итгэхгүй байгаагаа Буданов илэрхийлсэн байна.

"Оросоос юу ч гарч магадгүй, гэхдээ тийм илэрхий тэнэг үйлдэл гарахгүй. Уучлаарай, ийм зүйл болохгүй. Цөмийн цохилт өгөх нь Оросыг ялагдалд төдийгүй сүйрэлд дагуулна. Тэд үүнийг сайн мэдэж байгаа" хэмээн Буданов өгүүлжээ.

Түүний үзэж байгаагаар Оросын өндөр албан тушаалтнууд цөмийн зэвсэг ашиглаж болзошгүй талаарх мэдэгдэл хийж байгаа нь ердөө л "айлгах тактик" гэнэ.

Ойрын үед фронт дээр өрнөх үйл явдлын талаар тэрбээр таамаглахдаа Оросын цэргүүд Донецк болон Луганск мужуудыг эзлэн авах тал дээр анхаарлаа хандуулна, чухамхүү тэнд гол тулаан явагдаж байгааг онцолсон байна. Үүний зэрэгцээ Беларусийн нутгаас довтолж болзошгүй гэсэн хувилбарыг тэрбээр магадлал багатай хэмээн үзэж байгаа бөгөөд  Украины Зэвсэгт хүчний анхаарлыг сарниулж, хүчийг тарамдуулах зорилгооор ийм мэдээлэл тарааж байгаа хэмээн Буданов мэдэгджээ.

Будановын өгүүлснээр, Украины тагнуулууд Орост тэр дундаа Оросын төрийн байгууллагуудад ажилладаг гэнэ. "Энэ хүмүүстэй ажиллахад хялбар, тэд улс орон нь өөр байгаасай гэж хүсдэг, тийм байх ёстой гэдгийг ойлгодог хүмүүс" хэмээн Буданов өгүүлжээ.

Энд дуулгахад, 2023 оны зун Крымийн төлөөх тулаан  гарч болзошгүй гэсэн агуулга бүхий мэдэгдлийг өмнө нь Украины Ерөнхийлөгч Зеленский хийж байлаа. Тэрбээр Чехийн телевизэд ярилцлага өгөхдөө Украин Оросыг ялсны дараа хойг дээр очно хэмээж байв.

"Далай хармаар байна. Өвөл далайд юу хийх вэ гэж үү? Би тийшээ дулаан орохоор явна" хэмээн Зеленский өгүүлж байлаа. Түүнчлэн Крымийг эргүүлэн авахгүйгээр дайн дуусна гэж байхгүй хэмээн өмнө нь ч удаа дараа мэдэгдэж байса юм.

2023 оны наймдугаар сар гэхэд Украин Крымийг эргүүлэн авч чадна гэж АНУ-ын армийн Европ дахь  хүчний командлагч асан Бен Хожес ч мэдэгдэж байлаа. Крымийн хойгт хамааралтай дайны шийдвэрлэх үе шат 2023 оны зун тохионо,  үүний дараа Путин эрх мэдлээ алдана гэж тэрбээр мэдэгдэж байсан юм.

Г.Бямбасүрэн