АТГ-аас  өнөөдөр /2023.01.25/ мэдээлэл хийж, өнгөрсөн оны хэрэг шийдвэрлэлийн мэдээллийг өглөө. Тус байгууллага өнгөрсөн онд хуульд заасан харьяаллын 1806 үйлдэлтэй,  1184 холбогдогчтой 1520 хэрэгт хэрэг бүртгэл, мөрдөн байцаалтын ажиллагаа явуулсан байна. Энэ нь 2021 оноос 16.3 хувиар өссөн үзүүлэлт юм. 2022 оны төгсгөлд 715 хэрэг ажиллагаанд байгаа бол 2021 онд 480 хэрэг байжээ.

Авлигын гэмт хэргийн улмаас учирсан хохирлын хэмжээ 2021 онд 1 их наяд төгрөг байсан бол 2022 онд 5 их наяд төгрөг болон нэмэгджээ.

Мөрдөн шалгах ажиллагааны явцад төлүүлсэн хохирол 2021 онд 96 тэрбум төгрөг байсан бол  2022 онд 2.3 их наяд төгрөг байна. Мөн 518 тэрбум төгрөгийн хөрөнгийг битүүмжилжээ.

Мөрдөн шалгах ажиллагааны явцад 2021, 2022 онд гадаадын улсуудаас 12.2 сая ам.долларын өртөг бүхий хөрөнгийг буцаан авч, шүүхийн шийдвэрээр улсын орлого болгожээ.