Хүүхдийн мөнгийг олгохдоо иргэдийн орлогыг буруу тооцсон талаар ээжүүдийн төлөөлөл өнөөдөр мэдээлэл хийлээ.

Ээжүүдийн төлөөллөөс хүүхдийн мөнгө олголтод айл өрхийн өр, орлогын харьцааг тооцолгүй бодит амьдралд нийцүүлээгүйгээс олон өрх хохирсон талаар мэдээлж, хүүхдийн мөнгө олголтын амьжиргааны түвшин тооцоолох аргачлалд ноцтой алдаа гаргасан талаар шаардлага хүргүүлж байгаа юм. 

Ээжүүдийн төлөөл н.Дөлгөөн: Ээжүүдийн төлөөлөл Хөдөлмөр, нийгмийн халамжийн яаманд шаардлага хүргүүлсэн. Тэд биднийг 30-40 сая төгрөгийн өрхийн орлоготой гэж тооцоолсон. Нийт 10 сая төгрөгийн татвар төлөх ёстой гэдэг.  Би хоёр хоногийн хугацаанд өөрийнхөө фэйсбүүкээр дамжуулж мянга гаран өрхүүдийн бүх зовлонг сонссон. Бүгд надтай ижил ямар нэгэн бүртгэлийн алдаагүй байж есөн хувьд орсон байсан. Дийлэнх нь зөвхөн хөдлмөр хөлсний орлоготой байсан ба ямар нэгэн хувийн бизнес, давхар орлого байхгүйгээр зөвхөн цалингаараа орлогождог. 

ҮСХ, ХНХЯ болон арав гаруй төрийн байгууллагуудын хамтарсан ажлын хэсэг ажилласан гэсэн. Гэтэл яагаад өөрсдөө ажлаа хийхгүй байгаа юм бэ. Төр засгийн хариуцлагагүй байдлаас болж ард иргэд бид нэг өдрийн ажлаа золин байж мэдээллээ засуулах гэж явах ёстой вэ. Гурван жил тутам солих ёстой байдаг юм билээ. Нийгмийн даатгалд суурилсан орлогоос болж бид хасагдсан байна.

Жишээлбэл, би мэдээллээ засуулья гэхээр харьяа нийгмийн даатгалын газар дээрээ оч гэж байгаа. Миний орлогыг 30-40 сая төгрөг гэж гарсан байгаа. Энэ хамгийн том алдаа. Даатгуулагчийн цалингийн бохир дүнгээр тооцсон байна. Гар дээр ирдэг цэвэр дүнг тооцохгүй байгаа юм бэ. Гар дээр ирж байгаа цэвэр дүнг тооцохгүй байгааг, энэ аргачлал бодит амьдралд нийцэхгүй байна"  гэсэн юм.