Хөгжлийн банкыг Хянан шалгах түр хорооноос зохион байгуулж байгаа Нотлох баримтыг шинжлэн судлах сонсгол  ТОСК Хөдөлгөөнт цогцолбор төслийн зээлтэй холбоотой гэрчүүдийг дуудаж асуулт асууж, хариулт авч байна.

ТОСК Хөдөлгөөнт цогцолбор төсөлд Хөгжлийн банкнаас АНУ-ын MIC Inc компаниас худалдан авах барилгын хийц үйлдвэрлэх хөдөлгөөнт цогцолборын санхүүжилтэд Хөгжлийн банкнаас 7 тэрбум төгрөгийг жилийн 8 хувийн хүүтэйгээр олгосон байна. Зээлийн үлдэгдэл 25,65 тэрбум төгрөгт хүрч, чанаргүй зээлийн ангилалд багтсан байна. Тус зээлтэй холбоотойгоор Эрсдэлийн удирдлагын нэгжийн  дүгнэлт, зээлийн эдийн засгийн үр ашгийн талаарх тооцоо судалгаа байхгүй байхад Зээл хороо зээл олгохыг дэмжиж ТУЗ-д танилцуулсан бөгөөд ТУЗ нь тус өдрийн /2016.02.04/ 11 дүгээр тогтоолоор Гүйцэтгэх захиралд гэрээ байгуулах зөвшөөрөл олгосон нь Хөгжлийн банкны тухай хуулийг хэд хэдэн заалтыг зөрчсөн гэж үзэхээр байгаа юм. 

Хянан шалгах хорооны дарга Б.Энхбаяр: Авч болдоггүй, зарж болдоггүй хаяж болдоггүй хэдэн тоног төхөөрөмж авчихсан. Тухайн үед хэн гэдэг албан тушаалтан ийм юм авахаар 7 сая доллар шилжүүлсэн. Энэ бол Ерөнхий сайд асан Ч.Сайханбилэгийн саналаар авсан. Тухайн үеийн Сангийн сайд төрийн өмчийн III сургуулийн захирлаар ажиллаж байгаа Н.Болор ирсэнгүй. Гол тайлбарлах ёстой хүн. Эрх ямба эдлэх болохоор эдлээд, асуух болохоор ирдэггүй. Батлан хамгаалах яамнаас л гэрчүүд ирсэн байна. Энэ Батлан хамгаалах зориулалттай юмуу, энгийн тоног төхөөрөмж юм уу? 

Гэрч Батлан хамгаалах яамны Бодлогын хэрэгжилт зохицуулалтын газрын дарга Мөнхбаяр: Барилгын хийц үйлдвэрлэх хөдөлгөөнт цогцолбор нь цэргийн барилга байшин барих зориулалтгүй, энгийн зориулалттай. Зөвхөн барилга хийж үйлдвэрлэх хөдөлгөөнт хэрэгслүүд юм байна лээ. Үүнийг Батлан хамгаалах салбарт болон Зэвсэгт хүчинд өгөх боломжгүй гэсэн хариуг АНУ-аас өгсөн байдаг. Үүний дагуу дараагийн тогтоолийн дагуу Батлан хамгаалах яаманд гэж гаргаад дараа нь энэ тогтоолоо хүчингүй болгоод ТОСК-д шилжүүлсэн. Одоогоор Зэвсэгт хүчний анги дээр хадгалалтыг хариуцаж байна. 

Хянан шалгах хорооны дарга Б.Энхбаяр: Гэрээ байгуулахдаа 8 төхөөрөмж байсан. Одоо 6 ирсэн байна лээ. Маш асуултууд байна. Яг энэ асуудлаар Хөгжлийн банкны удирдлагууд зугтаад ирээгүй. 

П.ГОО