Нэгдүгээр сарын 18-ны өдөр Украины Бровары хотод нисдэг тэрэг осолдож, дотор нь зорчиж явсан Украины Дотоод хэргийн сайд болон түүний нэгдүгээр орлогч зэрэг олон хүн амиа алдсан юм. 

Энэ осол нь ердийн нэг золгүй явдал байгаагүй гэж Украины Ерөнхийлөгч үзэж байгаа аж. Тэрбээр энэ талаар нэгдүгээр сарын 18-ны өдөр Давосын Дэлхийн эдийн засгийн форумд үг хэлэх үеэрээ мэдэгджээ. 

"Өнөөдөр би болон манай ард түмэн туулж буй дайны туршлагаас харахад энэ бол золгүй явдал биш, энэ бол дайн" хэмээн Зеленский болсон хэргийн талаарх байр сууриа илэрхийлжээ.

Мөн дайн гагцхүү тулааны талбар дээр явагддаггүй хэмээн онцолсон байна. 

"Дайнд хэд хэдэн чиглэл байдаг. Золгүй явдал гэж байдаггүй, энэ бол дайны л үр дүн. Одоо болж буй бүх зүйл дайнаас үүдэлтэй" хэмээн Зеленский мэдэгджээ. Хөтлөгч түүнээс Боварыд болсон үйл явдлын дараа өөрийнхөө аюулгүй байдалд санаа зовниж байгаа эсэхийг асуухад "Би үүнд санаа зовохгүй байна" хэмээн Украины Ерөнхийлөгч хариулсан байна.

Энд дуулгахад, нэгдүгээр сарын 18-ны өдөр Броварыд нисдэг тэрэг осолдсон юм. Нисдэг тэрэг осолдож, хүүхдийн цэцэрлэг дээр унасан байна. Аврагчид эрэн хайх, аврах ажлыг дуусгасан бөгөөд онгоцны ослын улмаас 14 хүн амиа алдсаны нэг нь хүүхэд байгаа аж. Ослын улмаас 25 хүн бэртэж гэмтсэний 11 нь хүүхэд байгаа гэж Украины цагдаагийн газар мэдээлжээ.

Г.Бямбасүрэн