Экологийн идэвхтнүүд хэдэн өдөр эсэргүүцлийн арга хэмжээ зохион байгуулж байгаа Хойд Рейн-Вестфалигийн Лютцерат тосгоны орчимд Германы цагдаагийнхан Шведийн экологийн идэвхтэн Грета Тунбергийг саатуулжээ. 

Экологийн идэвхтнүүд энэ тосгонд нүүрсний уурхайг өргөтгөхийг эсэргүүцэж байгаа юм. Энэ тосгонд байх Гарцвайлер уурхай руу явсан эсэргүүцэгчдийн дунд Грета Тунберг байсан талаар DW мэдээлжээ. Цагдаагийнхан эсэргүүцэгчдийг тараахаар ирэх үед тэдний хооронд мөргөлдөөн гарч, улмаар цагдаагийнхан эсэргүүцэгчдийн эсрэг бороохой, нулимс асгаруулагч хий ашигласан байна. Цагдаагийнхан Грета Тунбергийг саатуулж, зарим оролцогчдын бичиг баримтыг нь шалгаж дуусах хүртэл цагдаагийн хэсэгт саатуулахаар болжээ. 

Лютцерат тосгонд ирсэн экологийн идэвхтнүүдийг тараах ажил нэгдүгээр сарын 11-ний өдөр эхэлсэн юм. Гарцвайлер уурхайг RWE нүүрс олборлогч компани эзэмшдэг бөгөөд энэ компани уурхайг өргөтгөх, сууринг буулгах зөвшөөрлийг 10 дугаар сард Германы эрх баригчдаас авчээ. Суурингийн оршин суугчид нүүсний дараа эсэргүүцэгчид эзгүй байшинд суурьшин, нүүрсний уурхайг өргөтгөхийг эсэргүүцэж эхэлжээ. 

Г.Бямбасүрэн