Засгийн газраас Хүүхдийн мөнгөний асуудлаар өнөөдөр /2023.01.17/ мэдээлэл хийлээ.

ЗГХЭГ-ын дарга Д.Амарбаясгалан: Хүүхдийн мөнгө олгох журам хэрэгжиж эхэлсэнтэй холбогдуулан ehalamj системд мэдээллийн зөрүүтэй байдал үүсэж, иргэдийн бухимдуулаад байна. Алдаа гарсныг бид хүлээн зөвшөөрөх ёстой. Хамгийн том алдаа нь өрхийн мэдээллийн нэгдсэн санд гарч байна. Өрхийн мэдээллийн сангаас мэдээллийг зохих хугацаанд нь хасалт хийдэггүй, мэдээллээ цаг тухай бүрт нь шинэчлээгүйн улмаас давхардал, зөрүү үссэж, алдаа гарсныг бид хүлээн зөвшөөрч байна.

Хүүхдийн мөнгө бодох аргачлалд мэдээлэл өгч байгаа НДЕГ, ХХҮЕГ, АТҮТ,  ҮСХ, УБЕГ, ТЕГ  гэсэн төрийн зургаан байгууллага хоорондоо мэдээллээ хангалттай солилцдоггүй, уялдаа муутай, мэдээллийн давхцал зэргээс хамаарч, асуудал үүсээд байна. Ийм алдаа дутагдлаас үүдэж, олон нийтийг бухимдуулсандаа Засгийн газар хүлцэл өчиж байна.

Монгол Улс  анх удаа төр өөрт байгаа мэдээллээ нэгтгэж, олон улсын жишигт нийцсэн аргачлалаар хүүхдийн мөнгө олгох ажлыг хийж эхэлсэн нь энэ. Өрхийн мэдээллийн санд асуудал үүссэн учраас гарсан алдааг засаж, цаашид цахимжих ажлаа улам бүр шинэчлэн ажиллах болно.

“Хүүхдийн мөнгө олгоно” гэж мэдэгдсэн иргэд ямар ч асуудалгүй мөнгөө авна. Харин орон сууц, машины давхардлаас үүдэж, өндөр орлоготой болж харагдаад байгаа иргэдийн мэдээллийг шинэчлэх ажлыг 14 хоногийн хугацаанд зохион байгуулна. Ингэснээр хүүхдүүдийн 91 хувийг Хүүхдийн мөнгөнд бүрэн хамруулах ажлыг Засгийн газар анхаарч ажиллана" гэдгийг илэрхийлж, иргэдийг мэдээлэл шинэчлэх ажилд идэвхтэй оролцохыг уриаллаа. 

Сангийн сайд Б.Жавхлан:  Мэдээлэл нь асуудалгүй хүүхдүүдийн мөнгө өнөөдрөөс орж эхэлнэ. Харин зөрүүтэй мэдээлэл шинэчлэгдсэний дараа буюу 02 дугаар сард 01 дүгээр сарын мөнгийг нөхөж өгнө. Гуравдугаар сарын мөнгийг Цагаан сарын үеэр урьдчилж өгөх бэлтгэл ажлыг Засгийн газар хийж байна.

2020, 2021 оны судалгаанаас харахад айл өрхийн 30 хувь нь Хүүхдийн мөнгийг шууд хэрэглэдэггүй, хадгаламжинд шилжүүлдэг бол 70 хувь нь шууд хэрэгцээндээ хэрэглэдэг.