Якутын Тонгулах цаг уурын станц дээр 30 жилийн өмнөх дээд амжилтыг эвдсэн агаарын хэм бүртгэгджээ. Энэ талаар Якутын Цаг уур, орчны шинжилгээний газрын дэд дарга Татьяан Маршалик РИА Новости агентлагт мэдээлсэн байна. 

Тодруулбал, даваа гарагт Тонгулахд термометрийн зүү -62,4 хэмийг заасан нь энэ бүс нутгийн хувьд хамгийн өндөр үзүүлэлт аж. Өмнө нь, 1993 онд -61,8 хэм хүрч хүйтэрсэн нь хамгийн дээд амжилтад тооцогдож байв. 

"2023 он гарсаар Жилинда цаг уурын станц дээр -62 хэм бүртгэгдсэн. Өөр ийм хүйтэн хаана ч гараагүй байсан юм" хэмээн Маршалик онцолжээ. Цаг уурчдын мэдээлснээр, Якутад хэт хүйтэн өдрүүд нэгдүгээр сарын 18-ныг дуустал үргэлжилж, Якутын 19 бүс нутагт -60 хэм давж хүйтрэхээр байгаа гэнэ. Цаг уурын онцгой үзэгдлийн улмаас сургууль цэцэрлэгийг цахим хичээлд шилжүүлжээ. 

Г.Бямбасүрэн