Miss Universe-2022 тэмцээн өнөөдөр буюу нэгдүгээр сарын 14-ний өдөр шагналтнуудаа тодруулна. Тэмцээний Үндэсний хувцас шалгаруулалтын даваанд оролцогчид улс орныхоо уламжлал, онцлогийг харуулсан даашинзыг өмсөн оролцдог. Энэ удаагийн тэмцээнд оролцогчид үндэсний хувцсаараа гайхуулсны зэрэгцээ зарим нь тун өвөрмөц гоёлыг сонирхуулжээ. 

Тринидад Тобаго улсын оролцогч асар том хүүхэлдэй бүхий алтлаг өнгийн хувцастай гарч иржээ. Энэ хүүхэлдэйн өндөр нь гурван метр орчим байсан гэнэ. 

Нидерландын гоо бүсгүй улсад нь ихээхэн алдартай голланд вафлины дүрс бүхий даашинзтай гарч иржээ. Банзал нь вафли хэлбэртэй бол малгай нь вафли, цайтай таваг, гүцийг дүрсэлсэн байна.

Харин Бразилийн гоо бүсгүй хясаан дээр хэвтэж буй лусын дагины төрхийг сонгосон байна.

Парагвайн оролцогч гоо бүсгүй нуруун дээрээ арслангийн толгойтой даашинзаар гангарчээ.

Гватемалын гоо бүсгүй суварга шиг, байшин барилга шиг төмөр хийцтэй тайзнаа гарч ирэв. Энэ нь алсаас даашинз мэт харагдах аж.

Амьтны дүрстэй гоёл өмсөн гарч ирсэн өөр нэг гоо бүсгүй нь Боливийн оролцогч. Тэрбээр үндэсний бэлгэдэл болох томхон шувууг толгой дээрээ залжээ. 

Г.Бямбасүрэн