"Хатан зоригийн гэр" хэмээн нэрлэгдсэн дахин нэг гэрийг Украины Киев хотод барьжээ. Анхны гэрийг нэгдүгээр сарын зургааны өдөр Бучад барьсан бөгөөд энэ гэрийн нээлтийг хийсэн нь Оросын эрх баригчдын зүгээс ихээхэн шүүмжлэлтэй тулгарч байлаа. 

Энэ гэрийг барихад Казахстаны эрх баригчид оролцсон бол энэ нь "Орос, Казахстаны стратегийн түншлэл, холбоотны харилцаанд" хор хохирол учруулна гэж Оросын Гадаад хэргийн яамны албан ёсны төлөөлөгч Мария Захарова мэдэгдээд, Казахстанаас албан ёсны тайлбар хүсэж байв. 

Үүний хариуд Казахстаны Гадаад хэргийн яамны албан ёсны төлөөлөгч Айбек Смадияров "Радио Азаттык"-д ярилцлага өгөхдөө Казахстаны Элчин сайдын яам үүнд огт хамааралгүй, гэр барих нь хувь хүмүүсийн санаачилга байсан гэж онцолсон байна.

"Гэр барих нь ноцтой асуудал биш тул энэ талаар тусгай тайлбар өгөх шаардлагагүй гэж бид үзэж байна. Харин ч бид ийм гэртэй гэдгээрээ бахархаж байгаа" хэмээн тэрбээр цохон тэмдэглэж байлаа.

Украин дахь казахууд "Хатан зоригийн гэр" хэмээн нэрлэгдсэн гэрүүдийг Украины хотуудад барьж эхэлсэн юм. Эдгээр нь Оросын халдлагын улмаас халаалтгүй болсон украинчуудад дулаацах боломж олгох аж. Энэ гэрт зочилсон хүмүүс дулаацахаас гадна казах үндэсний хоолоор дайлуулж байгаа гэнэ.

Буча хотод гэр барих санааг анх Украины ардын депутат Сергей Нагорняк гаргажээ. Тэрбээр нүүдэлчдийн үндэсний сууцыг барихад туслах саналыг Казахстаны уугуул Марат Дарменовт тавьсан байна.

Марат Дарменов бараг 40 жилийн өмнө л гэр барьж байсан ч депутатын саналаас татгалзаж чадаагүй гэж Обозреватель сонинд ярьжээ.

"Бид ах дүү зургуулаа Киевт амьдардаг юм. Манай хоёр ах тусалсан, бид багадаа гэр барьж байсан тул түүнийгээ эргэн санаж, гэрээ барьсан" хэмээн Марат Дарменов ярьжээ.

Марат ах дүүсийн хамт цаашлаад Львов, Харьков, Одесса, Черкасс зэрэг хотуудад гэр барихаар төлөвлөж, тэдний сайн үйлсэд бусад хүмүүс ч туслаж байгаа гэнэ.