Олон жилийн турш парламентын үүднээс буцсан Хөрөнгө оруулалтын банкны тухай хуулийг энэ удаагийн парламент өчигдөр эцсийн хэлэлцүүлэгт шилжлээ. 

Сануулахад, Улсын Их Хурлын гишүүн Б.Жавхлан нарын 18 гишүүнээс 2016 оны арван хоёрдугаар сарын 28-ны өдөр өргөн мэдүүлсэн Хөрөнгө оруулалтын банкны тухай хуулийн төсөл болон хамт өргөн мэдүүлсэн бусад хуулийн төслүүдийн хэлэлцэх эсэх асуудлыг Улсын Их Хурлын 2017 оны дөрөвдүгээр сарын 20-ны өдрийн нэгдсэн хуралдаанаар хэлэлцэн шийдвэрлэж, анхны хэлэлцүүлэгт бэлтгүүлэхээр Эдийн засгийн байнгын хороонд шилжүүлсэн байв.  Тус Байнгын хороо нь 2021 оны гуравдугаар сарын 31-ний өдрийн 08 дугаар тогтоолоор хуулийн төслүүдийг хэлэлцүүлэгт бэлтгэх үүрэг бүхий ажлын хэсгийг Улсын Их Хурлын гишүүн Ц.Цэрэнпунцагаар ахлуулан, Улсын Их Хурлын гишүүн Т.Амартүвшин, Ж.Бат-Эрдэнэ, Б.Бат-Эрдэнэ, О.Цогтгэрэл, С.Чинзориг нарын бүрэлдэхүүнтэйгээр байгуулсан байна. Ийнхүү хэдэн он дамжсан хуулийн төслийн эцсийн хэлэлцүүлгийг өчигдөр хийж хууль гараанаас гарахад бэлэн боллоо.

Хөрөнгө оруулалтын төрөлжсөн банкны үндсэн үйл ажиллагаа нь төсөл санхүүжүүлэх юм. Тодотгон хэлбэл, тодорхой төслийг санхүүжүүлэх явцдаа төслийнхөө талаар, үйл ажиллагааных нь талаар мэдээлэлтэй байж, амжилттай хэрэгжүүлэхэд дэмжлэг үзүүлэх боломжтой байх үүднээс харилцагч, түүний холбогдох этгээдийн гаргасан хувьцааны 20 хүртэл хувийг хөрөнгө оруулалтын төрөлжсөн банк нь эзэмшиж болох бөгөөд эзэмшиж байгаа хувьцаа нь саналын эрхгүй байхаар хуулийн төсөл тусгасан байна. Энэ төрлийн харилцааг нь Монголбанк, Санхүүгийн зохицуулах хорооноос хамтран баталсан журмаар зохицуулах юм.

Мөн  Хөрөнгө оруулсан компанийнхаа хувьцааны тодорхой хувийг худалдан авч, тав хүртэлх жилийн хугацаанд эзэмшинэ. Энэ хуулийн гол агуулгын нэг нь Хөрөнгө оруулалтын төрөлжсөн банк нь дотоодын банкууд ажилладаг хадгаламжийн зах зээл рүү орохгүй,  хадгаламжийн хүүг өсгөж, тэтгэврийн зээл өгөх гэх мэт асуудлыг бүгдийг хориглож зааглаж байгаа юм.  Том бизнес эрхлэхэд шаардлагатай мөртлөө дотоодын банкууд өгч чадахгүй байгаа мөнгийг оруулж ирэх зорилготойгоор үйл ажиллагаа явуулах юм.  Хуулийн төсөл батлагдсанаар 200 тэрбумаар банк өөрийн хөрөнгөө бүрдүүлсэн тохиолдолд нэг зээлдэгчид гурав дахин буюу 600 тэрбумын зээл өгөх боломж бүрдэж байгаа юм. Тэгэхээр томоохон ААН-д бүтээн байгуулалтын хөрөнгө оруулалтыг санхүүжүүлэх боломж бүрдэнэ гэсэн үг.

Ийнхүү гаднаас бага хүүтэй төрөлжсөн банк оруулж эрх баригчдын төлөвлөгөө эхлэлээ тавилаа. Энэ хууль Монголын дэд бүтцийн хөгжилд хувь нэмрээ оруулж буй АНН-үүдийн боломжийг нэмэгдүүлэхэд чухал хувь нэмрээ оруулна хэмээн найдан хүлээх л үлдэж байна. 

П.ГОО