Монголын иргэн Шаарийбуугийн Алтантуяа 2006 оны 10 дугаар сард бусдын гарт амиа алдсан. Түүний биед олон тооны тэсрэх төхөөрөмж суурилуулан дэлбэлсэн байсан бөгөөд энэ хэрэгт Малайзийн төр болон цагдаагийн газрын өндөр албан тушаалтан холбогдож, хэрэг шийдэх явц он удаан жил үргэлжилсэн юм.
Улмаар Малайзийн Дээд шүүх шийдвэр гаргаж, 2006 онд бусдын гарт амиа алдсан Шаарийбуугийн Алтантуяагийн гэр бүлд нөхөн төлбөр олгохыг Малайзийн засгийн газар болон өөр гурван хүнд үүрэг болгосон талаарх мэдээлэл өнгөрсөн оны 12 дугаар сарын дундуур гарч байв.
Дээд шүүх Малайзийн Засгийн газар болон улс төр судлаач Абдул Разак Багинда нарыг орчуулагч Шаарийбуугийн Алтантуяагийн үхэлд буруутайг хүлээн зөвшөөрсөн шийдвэр гаргасны дараа Малайзийн засгийн газар болон Абдул Багинда нар давж заалдсан талаар theedgemarkets.com мэдээлсэн байна.
Малайзийн хуулийн дагуу иргэний хэрэг дээр ялагдсан тал давж заалдах хүсэлтийг шийдвэр гарснаас хойш 30 хоногийн дотор гаргах эрхтэй байдаг аж. Хэрэгт буруутгагдсан талууд давж заалдах хүсэлт гаргасан талаар Ерөнхий прокурорын газрын иргэний хэлтсийн орлогч дарга, холбооны ахлах зөвлөх Шамсул Болхассан ч мөн баталсан байна.
Г.Бямбасүрэн
| Уншиж байна |