Хэзээ хамгийн сүүлд засварт орсон нь үл мэдэгдэх галт тэрэгний доторх орчин. Хүний наад захын хэрэглээх хангах тухай тэг хувийн ч ойлголтгүй хоцрогдсон нийтийн тээврийн үйлчилгээ үзүүлдэг УБТЗ. 

Дэлхийн улс орнуудтай жишиж харьцуулах зүйл огт байхгүй агааржуулалт, ариун цэврийн өрөөний тухай бүр дурсах ч хэрэггүй. Гэтэл УБТЗ-ын орлогч дарга нь хэрхэн яаж хөрөнгөжин валютыг төрөл төрлөөр гэртээ хураасныг нийгмээрээ харж, жигшин зэвүүцэж байна. 

Гэтэл даарин дээр давс гэдэг шиг Улаанбаатар төмөр зам ХНН-ээс мэдэгдэл гаргасан байх. Энэхүү мэдэгдлийн хариуд танай хамт олон харамсал илэрхийлье. Танай байгууллагын ажилтан, орлогч дарга сэтэртэй хүн их хэмжээний мөнгийг гэртээ хадгалж байгаад баригдчихлаа. Дандаа "алдагдалтай ажиллаж байна" хэмээн зовлон тоочиж суудаг танай байгууллагын хичнээн хүний гэрээс энэ хэмжээний, үүнээс ч илүү мөнгө гарч ирэхийг таашгүй. Энэ бол хуулийн байгууллагынхны мэдэлд очсон зүйл. Харин С.Батдөлийн ингэж зах замбараагүй хөрөнгөжсөн асуудал  бол УБТЗ ХНН-ийнхэн та бүхний удирдлага зохион байгуулалт, хяналтын тогтолцоогүй байгаагийн үнэн төрх. Хурган дарга чинь мөнгө хормойлон хурааж байхад ЭРХЭМ удирдлагууд та бүхэн хаана байсан хэрэг вэ? Эсвэл хамсаатан уу, та бүхэн... Энэ үйл явц танай байгууллагын нэр хүндэд чинь муугаар нөлөөлөх битгий хэл шавартай хутгалдчихаад байна. 

Гэмт хэрэгт нэр холбогдогч С.Батдөлийнхөө буруутай үйлдэлд хариуцлагаа хүлээж, удирдлагын баг чинь бүрэн бүрэлдэхүүнээрээ огцрох шалтгаан. Гэтэл нэр төр сэвтүүлсэн тухай МЭДЭГДЭЛ гаргаж суух нь хэр зохистой вэ? 

Жирийн, өдөр тутмын ажлаа үнэнчээр хийж буй төмөр замчдаар түрий барьж мэдэгдэл гаргаж арьсаа хамгаалахад хэтэрхий оройтсон шүү УБТЗ-ын эрхэм АЛБАН ТУШААЛТНУУДАА. 

П.ГОО