Сенегалд ням гарагт зам тээврийн ноцтой осол гарч, 40 хүн амиа алдан, 87 хүн шархаджээ. Энэ талаар DW агентлаг мэдээлсэн байна.

Эх сурвалжийн мэдээлснээр, тус бүр 70 зорчигч тээвэрлэж явсан хоёр автобусны нэгнийх нь дугуй хагарч, улмаар урсгал сөрж орсны улмаас энэ ноцтой осол гарчээ. Сенегалын Ерөнхийлөгч Твиттер хуудсандаа талийгаачдын ар гэрийнхэнд эмгэнэл илэрхийлж, гэмтсэн хүмүүсийг түргэн эдгэрэхийг ерөөгөөд нэгдүгээр сарын есний өдрөөс эхлэн гурав хоногийн туршид Үндэсний хэмжээний гашуудал зарлаж байгаагаа мэдэгджээ.

Баруун Африкийн энэ улсад зам тээврийн ноцтой осол гарах нь түгээмэл үзэгдэл болсон. Орон нутгийн хэвлэлүүдийн мэдээлснээр, замын нөхцөл байдал муу, түүнчлэн оршин суугчдын автомашины техникийн бүрэн бүтэн байдал хангалтгүй байдгийн улмаас байнга осол гардаг байна.

Г.Бямбасүрэн