Оросын алдарт уран гулгагч Камила Валиева Монголд энэ хавар ирж үзүүлбэрээ толилуулахаар болсон талаарх мэдээлэл гарч байсан. Валиева үнэхээр Монголыг зорих эсэх талаар "Матч ТВ" Спорт боловсролын "Самбо-70" төвийн ерөнхийлөгч Ренат Лайшеваас тодруулжээ. 

"Саяхан Монголд манай Оросын жудочид дэвжээнд гарсан. Монгол Улс спортын тал дээр бидэнд ямар ч саад бэрхшээл учруулахгүй байгаа, ийм нөхөрсөг орнууд хүнд үед нэгэндээ тусалдаг. Ийм орнууд илүү олон болно. Оросын спортыг цаашид бойкотлохоосоо хүмүүс залхана, энэ нь ямар ч сайн зүйлд хүргэхгүй" хэмээн Ренат Лайшев өгүүлсэн байна.

Түүнчлэн тэрбээр Камилатай уулзаж, ярилцсан талаараа өгүүлжээ.

"Тэр бэлтгэл сайн байгаа, өөрийгөө ч сайн барьж байгаа. Камилагийн сэтгэл санаа маш сайн байгаа. Валиева Монгол руу явж, тэнд үзүүлбэр толилуулж болох л юм. Гол нь л тэр сэтгэлээр унахгүй байхгүй хэрэгтэй. Охин ердөө 16 настай ч бүхнийг давж гарсан шүү дээ. Камила бол өөртөө итгэлтэй тамирчин. Тэр дахин үзүүлбэрт гарахаас татгалзах нь юу л бол. Мэдээж Этери Тутберидзе л шийдийг гаргана даа" хэмээн Лайшев өгүүлжээ.

Камила Валиева Монголд тоглох нь спортын тал дээр нь хэрэгтэй гэж үзвэл тэд Монголыг зорьж үзүүлбэр үзүүлэхийг үгүйсгэх аргагүй хэмээн тэрбээр онцолсон байна.

Г.Бямбасүрэн