Хятадын эрх баригчид ковидын тархалтаас сэргийлэх арга хэмжээгээ цуцалсны дараа энэ улсад өндөр албан тушаалын 20 инженер, эрдэмтэн ковидын улмаас нас барсан гэж South China Morning Post (SCMP) сонин мэдээлжээ. 

Эх сурвалжийн мэдээлснээр, 2022 оны 12 дугаар сарын 15-наас 2023 оны нэгдүгээр сарын хооронд гэхэд л 20 инженер, эрдэмтэн нас барсан нь 2017-2021 оны үеийн дундаж үзүүлэлтээс хэт давсан өндөр үзүүлэлт гэнэ. 2017 оноос хойш жилд дунджаар 16 академич нас барж байсан бол 2021 онд 13 нас баралт бүртгэгджээ. 

Сонины онцолсноор, нас барсан өндөр албан тушаалын эрдэмтэд нь бүгд Хятадын инженерийн академийн гишүүд байсан гэнэ. Тэднээс хамгийн залуу нь 77 настай, ахмад нь 102 настай байжээ.

Эрдэмтдийн дунд нас баралт их байгаа нь эмнэлгүүд ачааллаа дийлэхгүй болсны өөр нэг илрэл гэж Бээжингийн анагаахын шинжээч SCMP сонинд мэдээлсэн байна.

"Академийн гишүүд эмнэлгийн үйлчилгээг авахдаа давуу эрх эдлэдэг. Гэвч одоо эмнэлгүүдийн ачаалал хэтэрсэн тул тэднийг эмчлэх ор байхгүй байгаа нь өвчин хүндэрч амиа алдахад нөлөөлсөн байх" хэмээн нэрээ нууцалсан шинжээч өгүүлжээ.

Хятадад ковидын тархалтыг хязгаарлах арга хэмжээг цуцалсны дараа энэ улс даяар коронавирусийн халдвар эрчимтэй дэгдэж байгаа юм. Хятадын Өвчний хяналтын төвийн эрдэм шинжилгээний ерөнхий ажилтан Цэн Гуаны өгүүлснээр, Бээжинд гэхэд л хүн амынх нь 80 хувь нь коронавирусийн халдвар авчээ. 

Г.Бямбасүрэн