УИХ-ын чуулганы өнөөдрийн хуралдаан эхэллээ. Хуралдааны эхэнд өнөөдрийн хэлэлцэх асуудалтай холбогдуулан Б.Пүрэвдорж гишүүн "Бидний нөхөд тэтгэврийг цалингийн долоо биш таван жилийн дунджаар тогтоох хуулийн төсөл өргөн барьсан. Энэ хуулийн төслийг яаралтай хэлэлцэх шаардлагатай байна. 20 тэрбум төгрөгийн зардал л жилдээ гарна. 40 их наяд төгрөгийн хулгайны хажууд өчүүхэн мөнгө. Энэ хуулийн төслийг анхны хэлэлцүүлэгт оруулах талаар УИХ-ын даргын зөвлөлийн хуралдаанд санал гаргаад өгөөч П.Анужин дарга аа" гэлээ.

Үүний дараа "Зөвлөлдөх зөвлөл байгуулах тухай” Улсын Их Хурлын тогтоолын төслийг хэлэлцлээ. Хэлэлцэж байгаа асуудалтай холбогдуулан УИХ-ын гишүүн  Ц.Даваасүрэн "Үндсэн хуулийн тухай би байнга сануулж байгаа. Энэ бол бидний дээд дүрэм. Үндсэн хуулийг 2019 онд өөрчилсөн. Одоо дахиад өөрчлөнө гэж байна. Дараа гарч ирсэн хүмүүс дахиад өөрчлөнө. Ингэж өөрчлөөд яваад байвал энэ хууль сэг болно. Энэ бол тоглоом биш. Улс орны шилдгүүд энэ хуулийг хийсэн. Тэд бол ажлын туршлагатай, мөнгөний шуналгүй хүмүүс байсан. Үндсэн хуулийг хэн нэгэн өөртөө тохируулж өөрчилж болохгүй" гэлээ.

Ц.Даваасүрэн гишүүнийг үг хэлсний дараа УИХ-ын дарга Г.Занданшатар "Ц.Даваасүрэн гишүүн санал хэллээ. Энэ тогтоолын төслийг Үндсэн хуулийн нэмэлт өөрчлөлт гэж яриад байх юм. Зөвлөлдөх зөвлөл байгуулах нь ард түмний саналыг тандах зорилготой. Үндсэн хууль гэдэг ганц ч үг байхгүй шүү. Нийгэм эдийн засгийн тулгамдсан асуудлыг тодорхойлох судалгаа хийгдэнэ гэж ойлгох хэрэгтэй" гэлээ.

Ингээд байнгын хорооны саналаар "Зөвлөлдөх зөвлөл байгуулах тухай” Улсын Их Хурлын тогтоолын төслийг баталъя гэсэн томъёоллоор санал хураалт явуулж, 73,8 хувийн саналаар тогтоолын төсөл батлагдлаа. Тогтоолын төсөл батлагдсантай холбогдуулан УИХ-ын дарга "Аливаа нөлөөнд орохгүй, чин шударгаар ажиллахыг хүсье" гэлээ. 

Тогтоолын төсөл батлагдсанаар “Зөвлөлдөх зөвлөл"-ийг 

1.    Монголын Үндэсний худалдаа аж үйлдвэрийн танхимаас нэр дэвшүүлсэн эдийн засагч О.Амартүвшин

2.    Ардчилсан Үндсэн хууль тогтоогчдын холбооноос нэр дэвшүүлсэн эдийн засагч Ө.Ганхуяг

3.    Хувь иргэнээр нэр дэвшсэн эдийн засагч Б.Отгонтөгс

4.  Монголын ажил олгогч эздийн холбооноос нэр дэвшүүлсэн арьс, ширэн эдлэлийн инженер, технологич, Монгол Улсын зөвлөх инженер Х.Ганбаатар

5.    Монгол Улсын Шинжлэх ухааны академиас нэр дэвшүүлсэн гүн ухаан, нийгмийн ухааны багш, академич Г.Чулуунбаатар

6.    Төрийн бус байгууллагаас нэр дэвшүүлсэн улс төрийн эдийн засагч, эрх зүйч Л.Төр-Од

7.    Хувь иргэнээр нэр дэвшсэн зураг, хөдөлмөрийн багш Г.Галбадрах

8.    Радио электроникийн инженер Д.Моондой

9.    “Бодлогод залуусын хяналт” төрийн бус байгууллагаас нэр дэвшүүлсэн эрх зүйч Ц.Мандхайхатан

10. Монгол Улсын Их сургуулийн Үндсэн хуулийн эрх зүйн хүрээлэнгээс нэр дэвшүүлсэн судлаач О.Мөнхсайхан

11. Монголын Үйлдвэрчний эвлэлийн холбооноос нэр дэвшүүлсэн хөдөлмөрийн эдийн засагч С.Эрдэнэбат нарын бүрэлдэхүүнтэй байгуулж байгаа юм.

П.ГОО