УИХ-ын чуулганы нэгдсэн хуралдаанаар Засгийн газраас өргөн мэдүүлсэн Орхоны хөндийд хот байгуулах төслийг хэлэлцэж эхэллээ. Хэлэлцэж буй асуудалтай холбогдуулан УИХ-ын гишүүн Х.Баделхан:  Чухал тогтоолын төслийг дэмжиж байна. эрт ярьсан бол бүр сайн байсан. Улаанбаатар хотод хүн багтахаа больсон. Шинээр хот байгуулж байж, энэ асуудлыг шийднэ. Хархорум хотыг Монгол Улсын нийслэл болгохоор төлөвлөх хэрэгтэй. Улаанбаатар хотын түгжрэл, утааны асуудлыг шийдэхийн тулд Хархорум хотыг байгуулах нь зүйтэй.

Хот байгуулахын тулд ерөнхий төлөвлөгөө гаргаж, инженерийн дэд бүтцийг шийдэх ёстой. Төлөвлөлтийг маш сайн хийх хэрэгтэй.

Улаанбаатар хот хичнээн хүн амьдрах даацтай хот вэ? Хархорум хотод хэдэн хүн суурьшуулахаар төлөвлөж байгаа вэ?

БХБЯ-ны Төрийн нарийн бичгийн дарга С.Магнайсүрэн: Орхоны хөндийд хот байгуулахаар хэд хэдэн судалгаа хийсэн. Өнөөдөр Хархорин хот хангайн бүсийн тулгуур хот. БХБЯ-наас 400 орчим сая төгрөг зарцуулж, хот байгуулах байршлын ТЭЗҮ-г боловсруулах гэрээг зураг төслийн хүрээлэнтэй байгуулсан. 03 дугаар сарын 01 гэхэд шийдэж, байршлаа эцэслэн батална. Өнөөдрийн байдлаар гурван байршлын санал орж ирсэн.

1. Тоглохын талд 40.4 мянган га

2. Өгий нуур орчим 168.6 мянган га

3. Онгоцон хөндийд 41.4 мянган га газрын байршлыг судалж байна.

Газар зохион байгуулалт, геодизи зурагзүйн газрын дарга Л.Одбаатар: Улаанбаатар хотод 1.4 сая хүн амьдарч байна. Улаанбаатар хотын 2020 оны хөгжлийн ерөнхий төлөвлөгөөний тодотголоор 1.5 сая хүн амьдрах боломжтой байхаар батлагдсан. 2040 он хүртэл хөгжүүлэх ерөнхий төлөвлөгөөгөөр 1.7 сая хүний багтаамжтай байхаар төлөвлөж байна.

УИХ-ын гишүүн Ц.Туваан: Шинэ хот хэдэн хүн амьдрах вэ? Ямар хэмжээний хөрөнгөөр энэ хотыг байгуулах вэ? Хөрөнгийн эх үүсвэрийг яаж босгох вэ?

БХБЯ-ны Төрийн нарийн бичгийн дарга С.Магнайсүрэн: Улсын нийслэл биш шинэ Хархорум хотыг байгуулах асуудлыг УИХ-аар шийдүүлэхээр орж ирж байна. УИХ-аас хот байгуулах шийдвэр гаргасан тохиолдолд эхлээд хот байгуулах газраа сонгож, ТЭЗҮ боловсруулна. ТЭЗҮ гарсны дараа Ерөнхий төлөвлөгөө гаргаж, хот байгуулахад ямар хэмжээний хөрөнгө оруулалт орох, хэдэн хүн амтай байх, дэд бүтцийг хэрхэн хийх нь тодорхой болно.