УИХ-ын чуулганы хуралдаанаар Хөрөнгө оруулалтын банкны тухай хуулийн төслийн анхны хэлэлцүүлгийг хийж байна. Хэлэлцэж байгаа асуудалтай холбогдуулан гишүүд асуулт асууж, хариулт авч байна.

УИХ-ын гишүүн Ц.Даваасүрэн: Энэ банкыг Хөгжлийн банк шиг болгохгүйн тулд анхаарал хандуулж ажиллаж хэрэгтэй. Ялангуяа баталгаанууд болон гадаад зах зээл дээр үнэт цаас гаргах асуудалд хяналттай хандах хэрэгтэй. Монголбанк өнгөрсөн хугацаанд Хөгжлийн банкинд хяналтаа маш муу тавьсан. Ирээдүйн хөрөнгөөр барьцаална гэсэн зээлүүд байсан. Журмаар зохицуулна гэсэн ч ирээдүйн хөрөнгөөр орлогоор барьцаалж зээл авч байсан юм бэ? Үүн дээр анхаарахгүй бол гадагш нь баахан үнэт цаас гаргаад улсаа оронд оруулаад хаячихсан байх вий.

УИХ-ын гишүүн Б.Энхбаяр:  Би Ц.Даваасүрэн гишүүнтэй адилхан бодсон байна. 10.7  дахь заалт дээр Хөрөнгө оруулалтын төрөлжсөн банкнаас санхүүгийн хэрэгсэл худалдан авах, худалдах харилцааг Монголбанк, санхүүгийн зохицуулах хорооноос баталсан журмаар зохицуулна гэжээ. Энэ харилцаа журамаар бус Үнэт цаасны хуулиар зохицуулагдах ёстой. Хууль тогтоох эрх мэдэл зөвхөн УИХ-д хадгалагдаж байгаа. Гэтэл хууль тогтоох эрх мэдэл хоёр янзаар Засгийн газар руу шилжээд байна. Засгийн газар болон сайд нар энэ журмыг зохицуулна гээд хууль тогтоох эрх мэдлийг булааж аваад байна. Дараа нь хариуцлагыг нь УИХ үүрдэг. Боломжтой харилцааг хуульчлах ёстой. Журмын цаана эрх олж аваад хулгайгаа хийгээд байна.

Хөрөнгө оруулалтын төрөлжсөн банкнаас гарах баталгаа, батлан даалт тавих шаардлага нөхцлийг Монголбанк журмаар зохицуулна гэсэн ерөнхий ганц үг байна. Ямар шаардлага, нөхцөл, хүрээ хязгаар байх вэ гэдгийг хуульчлах ёстой.  УИХ Үндсэн хуульд зааснаар төрийн мөнгөний бодлого, зээлийн бодлогыг тогтоох заалт бий. УИХ-ын хуваалцдаггүй бүрэн эрх. Энэ бүрэн эрхийг Монголбанк журам гаргаад л авах нь. Үүнийг нарийвчлах шаардлага байна.

Арилжааны банкуудын удирдлага хувь хүнээрээ эсвэл өөрийн үүсгэн байгуулсан хамаарал бүхий компаниараа баталгаа гаргаж, өөрийн банкнаас гаргаж байгаа зээл дээр өөрөө иргэнээр, компаниараа мөнгө угаасан асуудал гарсан. Үүнийг нотлох баримттайгаар Түр хорооны сонсгол дээр ярина. Үүнд Монголбанк  оролцдог, өөгшүүлдэг, хуйвалддаг нөхцөл байдлууд тогтоогдож байна. Эцсийн хэлэлцүүлэг дээр журмаар зохицуулсан асуудлуудыг гүйцээн боловсруулж хуульчилж тодорхой болгох дээр чиглэл өгөөч гэж хүсэлт гаргаж байна.

Чуулганы хуралдаан үргэлжилж байна.