Цар цахлын жилүүдэд төр бүсээ чангалж, Төрийн хэмнэлтийн хуулийг хэрэгжүүлж эхэлсэн. Сайд дарга нар машинаа хураалгаж, тансаглал танагдахаар болсон. Сайн хэрэг. Гэтэл аймаг, сум, багт Төрийн хэмнэлтийн хуулиас болж иргэд төрийн үйлчилгээг авч чадахгүй нөхцөл байдал үүсчээ. 

Төрийн хэмнэлтийн тухай хуулиар эмнэлэг, онцгой байдал, цагдаа, байгаль орчны хамгаалал, хот тохижилт, нийтийн аж ахуй, мал эмнэлэг, мэргэжлийн хяналтын байгууллага болоод үндсэн үйл ажиллагаа нь тусгай зориулалтын тээврийн хэрэгсэл ашиглах шаардлага бүхий байгууллагуудын автомашины хэрэглээг хязгаарлахгүй байхаар тусгасан. Энэ хууль орон нутагт бүрэн утгаараа хэрэгжиж, сөрөг үр дагаврууд ч гарч эхэлсэн байна. Хууль хэрэгжиж эхэлснээр алслагдмал газар отор нүүдэл хийж байгаа малчдад төрийн үйлчилгээ хүрч чадахгүйд хүрчээ.

Сум, багийн дарга нар машингүй, явгарснаас үүдэн малчин иргэдэд төрийн үйлчилгээг хүргэж чадахгүй байна. Тухайлбал, Баян-Өлгий аймгийн Булган суманд өвөлжилт хүндэрсэн. Гэвч Булган сумын Засаг дарга машингүй. Малчдаараа тойрч, төрийн үйлчилгээг хүргэх ямар ч боломжгүй нөхцөл байдал үүссэн байна. Төрийн хэмнэлтийн хуулийн дагуу Засаг дарга машин авч болохгүй. Яг үүн шиг маш олон сум, багийн Засаг дарга нарын тулгамдсан асуудал болсон байна. Өнөөдрийн байдлаар Монгол орны нийт нутаг дэвсгэрийн 70 хувь нь цасан бүрхүүл тогтсон өвөлжилт, хаваржилт хүндрэх болзошгүй нөхцөл байдал үүсээд буй. Гэтэл малчид, иргэдэд төрийн болон эрүүл мэнд, нийгмийн халамжийн үйлчилгээ хүрэхгүй тасалдахад хүрч буй нөхцөл байдалд эрх баригчид дүгнэлт хийх биз ээ. 

ТӨРИЙН ХЭМНЭЛТИЙН ТУХАЙ ХУУЛЬ 6 дугаар зүйл.Тээврийн хэрэгсэл

6.1.Улсын Их Хуралд ажлаа шууд хариуцан тайлагнадаг байгууллагын тэргүүн дэд, дэд, орлогч дарга болон дэд сайд, яамны төрийн нарийн бичгийн дарга, Засгийн газрын агентлагийн дарга, төрийн болон орон нутгийн өмчит хуулийн этгээдийн захирал, төсвийн байгууллагын дарга хот дотор албан тушаалын суудлын автомашин ашиглахыг хориглоно.

6.2.Аймаг, нийслэл, дүүргийн иргэдийн Төлөөлөгчдийн Хурлын дарга, аймаг, сум, нийслэл, дүүргийн Засаг даргаас бусад этгээд албан тушаалын суудлын автомашин ашиглахыг хориглоно.

6.3.Энэ хуулийн 3.1-д заасан этгээд орон нутагт албан томилолтоор, хуульд заасан эрх бүхий этгээд газар дээрх хяналт шалгалтаар ажиллахад хувийн хэвшлийн аж ахуйн нэгж, эсхүл төрийн болон орон нутгийн өмчийн автотээврийн байгууллагаар үйлчлүүлэхээс бусад тохиолдолд автомашин ашиглахыг хориглоно.

П.ГОО