Орос, Украины хооронд дайн дэгдсэнээс хойш энэ дайныг эсэргүүцсэн Оросын иргэдийн зарим нь  гадаад орныг зорьж, үлдсэн нь эх орондоо үг хэлэх эрх чөлөөгөө хасуулж, дайн эсэргүүцсэн агуулгатай үг хэлсэн алдартнууд ихээхэн шүүмжлэлд өртөж байгаа юм. Ийм л шалтгаанаар Зөвлөлт, Оросын нэрт дуучин Алла Пугачева нөхөр Максим Галкин, хүүхдүүдийн хамт амьдрах болсон. Энэ удаад Оросын алдарт дуучин Меладзе шүүмжлэлийн бай болжээ. 

Тодруулбал, Дубайд болсон шинэ жилийн үдэшлэгт Валерий Меладзе оролцож байгааг харуулсан дүрс бичлэг цахим орчинд тархсан байна. Энэ бичлэгийг хийсэн хүн дуучинд хандан "Украин мандтугай" гэсэн үг хэлэхийг хүсжээ. Үүний хариуд Меладзе амнаасаа микрофоноо холдуулаад "Баатрууд мандтугай" хэмээн хэлээд нүдээ ирмэсэн байна. Меладзег ийнхүү хариу өгсний дараа бичлэг хийж байгаа хүн түүнийг биширч байгаагаа хэлэн хашгирахад дуучин тайвшрахыг хүсэн "бид энд улс төрөөс ангид байна" хэмээн өгүүлжээ.

Дубайд болсон энэ тоглолт дээр Украин руу хийсэн Оросын түрэмгийлэл, Кремлийн бодлогыг илэрхий дэмждэг дуучин Олег Газманов ч оролцжээ. Цахим орчинд тархсан өөр нэг бичлэг дээр нэгэн үзэгч Газмановыг дуулж байх үеэр "Дайн эсэргүүцэж байна" гэж дуучин руу хашгирахыг завдаж байх аж. Дараа нь Газмановыг дайн эсэргүүцэж байна гэж хэлэхийг шаардахад тэрбээр амармаар байна гэж хариулжээ. 

Энэ тоглолтын үеэр Меладзегийн хэлсэн үгсийг харуулсан бичлэгийн дараа Меладзе шүүмжлэлийн бай болсон байна. Улс төрчид болон олон нийтийн байгууллагын төлөөлөгчид Меладзег эрс шүүмжилж иргэншлийг нь хасахыг уриалжээ. 

"Мал, эргүү амьтан! Бандеровчуудыг дэмжсэнийх нь төлөө Меладзег Оросын иргэншлээс хасах ёстой. Манай хүмүүс орос хүмүүсийн төлөө, Оросын нутгийг хамгаалж үрэгдэж байхад ийм зүйл байж таарахгүй" гэж Оренбург мужаас сонгогдсон сенатч Елена Афанасьева мэдэгдсэн байна. 

"Шударга Орос-Үнэний төлөө" фракцийн тэргүүн  Сергей Миронов ч дуугүй өнгөрсөнгүй.

"Гадаадад болсон нэг үдэшлэгийн үеэр Валерий Меладзе Украины үндсэрхэг уриаг дэмжжээ. Дараа нь "би улс төрөөс ангид хүн" гэж хэлсэн л дээ. Гэхдээ гадаад улсад үдэшлэг зохиож, тэр бүү хэл гэмт хэргийн шинжтэй уриаг дэмжих нь "улс төрөөс ангид байгаа" хүний шинж үү? Түүний үйлдлийг шүүмжлэхээс аргагүй. Жинхэнэ орос уран бүтээлч ингэхгүй, ингэх ч ёсгүй. Меладзегийн бүх шагналыг хураахыг санал болгож байна" хэмээн тэрбээр мэдэгджээ. 

Төрийн думын өөр нэг гишүүн Меладзег Орос руу нэвтрэхийг хориглох санал гаргасан байна. 

"Түүнийг "гадаадын агент" гэж тооцохыг би дэмжиж байна. Ер нь тэр холхон байх нь дээр, түүнийг Орос руу нэвтрэхийг хориглох хэрэгтэй" хэмээн Төрийн Думын гишүүн Нина Останина өгүүлжээ. 

Энэ бүх шүүмжлэлийн хариуд Меладзе мэдэгдэл хийсэн байна.

"Хүмүүс ээ, та нар намайг сонсож, намайг ойлгоосой гэж би хүсэж байна. Би болон бусад олон хүн уй гашуу мэдэрч амьдраад 10 сар боллоо. Миний хамгийн хайртай хоёр ард түмэн сөргөлдөж, хүмүүс амиа алдаж байна. Би хэнийг ч үзэн ядаж чадахгүй, ингэхийг ч хүсэхгүй байна. Энэ бүх зүйл дуусаж, ойр дотны ард түмнүүд хооронд зөвшилцөл тогтоосой гэж би хүсэж байна. Үүний тулд бүхий л хүч чадлаа зориулахад бэлэн" Меладзе өгүүлсэн байна. 

Валерий Меладзе өмнө нь ч Украин дахь дайныг шүүмжилж байсан бөгөөд үүний дараа Орост хийх тоглолтууд нь цуцлагдаж байв.

Г.Бямбасүрэн