Узбекистанд 19 хүүхдийн аминд хүрсэн сиропон эмийг Энэтхэгт үйлдвэрлэхээ зогсоожээ. Узбект Энэтхэгт үйлдвэрлэж, тус улсад экспортлосон "Док-1Макс" сиропон эмний найрлагад багтсан хорт бодисоос болж 19 хүүхэд амиа алдсан нь тогтоогдсон юм. 

Улмаар эм импортлосон компани, эмийн зөвшөөрөл олгосон холбогдох албан тушаалтнуудын эсрэг хэрэг үүсгэн шалгаж эхэлсэн бол Энэтхэгт ч мөн ижил арга хэмжээ авч эхэлжээ. Тодруулбал, Энэтхэгийн Barion Biotech компанийн эмийн бүх үйлдвэрийг зогсоож, үйлдвэрлэгчийн эсрэг эрүүгийн хэрэг үүсгэн шалгаж эхэлжээ. 

Мөн Узбект энэ компанийн үйлдвэрлэсэн бүх эмийг худалдахыг хориглосон байна. Шалгалтын явцад "Док-1Макс" сиропон эмэнд агуулагдах этиленгликолийн найрлага зөвшөөрөгдсөн хэмжээнээс 300 дахин их байсан гэнэ. Энэ бодисын 95 хувийн уусмалыг 1-2мл*кг хэмжээгээр хэрэглэхэд л өвчтөнд бөөлжих, ухаан алдах, татах, бөөрний архаг дутагдалд орох зэрэг ноцтой өөрчлөлтүүд гардаг аж.

Г.Бямбасүрэн