2023 оны төсвийн тухай хууль батлагдан гарснаас хойш хоёр сарын нүүр үзэж байна. Төсвийн тухай хуульд 2023 онд 891.8 мянган хүүхдэд сар бүр 100,000 төгрөгийн тэтгэмж олгох боломжтой байхаар тусгасан. Гэтэл үүнийг хэрхэн яаж олгох талаарх аргачлал өнөөдрийг хүртэл тодорхой болоогүй байна.  Энэ онд хүүхдийн мөнгийг өндөр орлоготой буюу 3,5 сая төгрөгөөс дээш өрхийн орлоготой айлд олгохгүй гэх мэдээлэл буй. Ихэнх иргэдийн зүгээс хүүхдийн мөнгөө үргэлжлүүлэн авах хүсэлтэй байгаа талаар учирлаж буй.  

Төсвийн хууль батлагдан гарсны дараахан Сангийн дэд сайд С.Мөнгөнчимэг "Эдийн засгийн нөхцөл байдал амаргүй цаг үед өндөр орлоготой өрхүүд хүүхдийн мөнгөнөөс татгалзаад дэмжлэг хэрэгтэй өрхүүдэд олгохоор төсөвт тусгасан. Өрхийн орлоготой нь уялдуулж хүүхдийн мөнгө олгохтой холбоотой ХНХЯ-н дээр ажлын хэсэг гараад ажиллаж байна. Ажлын хэсгээс тодорхой аргачлал гаргаад нэг сарын 1-ээс хүүхдийн мөнгө олгогдоод эхэлнэ" хэмээн мэдэгдсэн.

Харин өнөөдөр 2023 оны нэгдүгээр сарын 3. ХНХЯ өнөөдрийг хүртэл хүүхдийн мөнгийг хэрхэн, яаж олгох талаар аргачлалаа гаргаагүй байгаа нь нийгэмд төөрөгдөл үүсгэх нөхцөл болж байна. Тодруулбал, өчигдөр буюу шинэ оны ажлын эхний өдөр нийгмийн сүлжээнд "Хүүхдийн мөнгө авах хүмүүс И-Баримт аппликейшн, И-Халамж системд хүсэлт гаргана" гэх мэдээлэл түгсэн. Гэвч дээрх бүртгэлээр хүүхдийн мөнгө олгогдох эсэх нь тодорхой бус байгаа талаар албаныхан тайлбар өгсөн юм. Ийнхүү төсвийн жил эхэлчихсэн энэ өдрүүдэд төсөв тусгагдсан арга хэмжээг хэрхэн хэрэгжүүлэх эсэх нь тодорхой бус байгаа асуудалд ХНХЯ дүгнэлт хийх хэрэгтэй юм.

П.ГОО