Таиландтай залгаа хил дээр байх Камбожийн казино, зочид буудлын цогцолборт гал гарсны улмаас 19 хүн амиа алджээ. Энэ талаар орон нутгийн эрх баригчид мэдэгдсэнийг ВВС агентлаг дамжуулсан байна. 

Grand Diamond City  казино Пойпет хотод байрлах бөгөөд лхагва гарагт, орон нутгийн цагаар 23.30 цагт казинод гар гарчээ. Галын шалтгааныг тодруулахаар холбогдох байгууллагууд ажиллаж байгаа юм байна. Одоогоор 19 хүний цогцосыг олсон, хохирогчдын тоо нэмэгдэж болзошгүй гэж орон нутгийн захиргааны төлөөлөгч мэдэгджээ. 

Харин Камбожийн хэвлэлүүд амиа алдсан хүний тоо хавьгүй их хэмээн мэдээлсэн байна. Олон нийтийн сүлжээгээр тархсан дүрс бичлэгүүд дээр хүмүүс казиногийн цонхоор унаж, үсэрч байгаа нь дүрслэгджээ. Олон хүн дээд давхруудад гарах гарцгүй болсон, тэд амьд үлдэж чадсан гэх магадлал тун бага хэмээн Таиландын  Ruamkatanyu Foundation байгууллагын сайн дурын ажилтнууд хэвлэлийнхэнд өгүүлжээ.

"Хүмүүс утаанд хордож үхэхгүйн тулд барилгаас гүйн гарч байгааг харсан. Дараа нь бидний нүдэн дээр л хүмүүс цонхоор үсэрч эхэлсэн" хэмээн нэгэн сайн дурын ажилтан өгүүлжээ.

Барилгад гарсан галын улмаас өтгөн утаа үүссэн тул аврагчид хүмүүсийг эрэн хайхад хүндрэлтэй байсан гэнэ. Энэ казино зочид буудалд 400 хүн ажилладаг бол казиногоор үйлчлүүлэгчдийн дунд Таиландын иргэд олноор байсан гэнэ.

Г.Бямбасүрэн