УИХ-ын чуулганы өнөөдрийн хуралдаан эхэллээ. Хуралдааны эхэнд өнөөдрийн чуулганы хуралдаанаар хэлэлцэх асуудалтай холбогдуулан гишүүд үг хэлж, асуулт асууж байна. 

УИХ-ын гишүүн С.Ганбаатар "Хэдүүлээ том хулгайг зогсоох хэрэг гарлаа. "Эрдэнэс Тавантолгой" компанийг хувьчлах гэж байна. Уул уурхайн биржийн тухай хуулийг дагаж орж ирж байгаа УИХ-ын тогтоолын төсөлд "Эрдэнэс Тавантолгой компанийн хувьцааг нийтэд санал болгохыг зөвшөөрсөн үнэт цаасны бүртгэл болон арилжаа эрхлэх байгууллагын бүртгэлд бүртгүүлэх гэх заалт орж ирсэн байна. Ч.Сайханбилэгийн Засгийн газар ГОК-ийн 49 хувийг хувьчлах гэж байгаад "бөөрөө гаргуулсан". МАН-ынхан та нар үүнийг хийснээрээ БҮРЭН ҮХЭЛД хүрнэ. Төр өмчийн эрхэнд халдаж байна. МАН-аас тавьсан "Эрдэнэс тавантолгой"-н захирал олон зуун сая төгрөг хулгайлаад эзэддээ өгсөн нь нь буруу. Ил тод, хяналттай болгох ёстой. Гүйцэтгэх захирлын хариуцлагыг чангатга гэсэн болохоос Монголын ард түмнээс өмчийг нь хулгайл гэсэн үг биш. Иймээс тогтоолын төслийг хэлэлцэх асуудлыг жагсаалтаас хасах саналтай байна" гэлээ. 

Үүнд УИХ-ын дарга Г.Занданшатар " Эгзэгтэй цаг үед ард түмнийг төөрүүлж байна. Өнөөдрийн хэлэлцэх асуудалд ийм асуудал байгаа. Энэ бол ард түмэнд нээлттэй болгож, 1072 хувьцааг бүртгэлд хамруулж зөв болгох гэсэн санааг Уул уурхай хүнд үйлдвэрийн яам холбогдох газрууд явж байгаа. Тооцоо судалгаатай ярь" гэсэн хариулт өглөө. 

УИХ-ын гишүүн Д.Ганбат "Боломжоо, амьдралаа хулгайлуулсан залуус хүйтэн цеметен дээр эрүүл мэндээ золиослолоо. Нүүрсний хулгай нарыг зарла гэсэн нь нэг их үр дүнд хүрсэнгүй. 10 жил төмөр замыг воган, доторх ачаатай нь хулгайлсан хүмүүс шийтгэлгүй үлдэж байна. Өчигдрийн сонсгол нүүрсний хулгайчдыг өмгөөлөх хурал болоод л тарж байна. Монгол Улсад хэн жаргалтай байна вэ? Нүүрсний хулгайчид л жаргалтай байна. Нүүрсний хулгайчид бүх газар шингэсэн. Хууль хяналтын байгууллага ажиллахгүй байна. Үе үеийн ЗГХЭГ-ын дарга нар, Ерөнхий сайдууд албан тушаалаа татгалзаад шалгуучихвал яадаг юм бэ?" гэж үг хэллээ. 

П.ГОО