АТГ-аас нүүрсний хэргээр шалгагдаж буй хэмээн зарласан 17 хүний нэг нь УИХ-ын гишүүн Д.Бат-Эрдэнэ. Тэрбээр хуулийн байгууллагаас өөрийг нь дуудаагүй гэдгийг хэлж байна. Д.Бат-Эрдэнэ гишүүн "Яг одоогоор хуулийн байгууллагаас намайг дуудаж, асуугаагүй байна. Дуудвал би бэлэн, очоод бүх асуудлаа тайлбарлана" гэсэн тайлбарыг өглөө.

УИХ-ын гишүүн Д.Бат-Эрдэнэ "Би бизнес эрхэлдэг, улс төр хийж байгаа хүний хувьд бүх юм нээлттэй. Орон нутгийн өмчит, Монголын Хөрөнгийн биржид хувьцаа нь арилжаалагддаг Тавантолгой ХК гэж бий. Энэ компани дээр 1991.01.04-ний өдрийн БНМАУ-ын Засгийн газрын тогтоолоор БЭТ томилсон асуудлыг нийтээрээ нээлттэй ярилцах ёстой. Эрх баригч, сөрөг хүчин гэсэн байр сууринаас биш хуулийн хүрээнд харах байх. Төрийн өмчтэй байх үеийн, 1991 оны хуулиар хувьцаа нь нийтэд арилжаалагдсан компанид БЭТ томилох нь гадна дотны хөрөнгө оруулагчдыг үргээсэн эвгүй арга хэмжээ байж магадгүй" гэсэн байр суурийг илэрхийллээ.

Б.Хэрлэн