Нүүрсний хулгайд нэр холбогдсон УИХ-ын таван гишүүн өнөөдөр /2022.12.16/ мэдээлэл хийлээ. УИХ-ын гишүүн Ш.Раднаасэд “Нүүрсний хулгайтай тууштай тэмцэх бодол гүнзгий болж байна. Судалж үзэхэд Монголын ард түмний баялгийг цөөхөн хэдэн хулгайч идэж дуусаж байгаа юм байна. Улсын төсвөөс давсан хэмжээний хулгай дээрэм зохион байгуулалттай явж байна. Тиймээс үүний эсрэг тэмцэхээр бидний хэдэн нөхөд лобби бүлэг байгуулж байна. Нийт 28 гишүүн гарын үсэг зурсан.

Эрдэнэс Тавантолгой компанийн үйл ажиллагааг олон нийтэд нээлттэй, худалдан авалтыг сар тутам олон нийтэд мэдээлдэг хэлбэр рүү явуулна. Зөвхөн энэ компани биш уул уурхайтай холбоотой бүх төрийн өмчит компаниудын үйл ажиллагааг ил болгоно.

Бид, ард түмэн хууль хяналтын байгууллагад итгэхгүй байгаа. Ард түмэн жинхэнэ хулгайчдаа зарла гэж гудамжинд жагсаж байна. Тиймээс УИХ хэлэлцэх эсэхийг нь шийдсэн байгаа Шүгэл үлээгчийн эрхзүйн байдлын хуулийг яаралтай батлуулахын төлөө ажиллана. Шүгэл үлээсэн сэтгүүлчид, ард түмэн хулгайчдын олсон орлогын 20-30 хувийг авах нь зөв хэмээн үзэж буйгаа илэрхийллээ. 

Б.Хэрлэн