Төрийн болон орон нутгийн тухай хуулийн хэлэлцэх эсэхтэй холбогдуулан чуулганы хуралдааны эхэнд Б.Энхбаяр гишүүн үг хэллээ. 

Түүний зүгээс "Өмч хувьчлалын өрмийг хамгийн их хамсан хүмүүс улстөрд орж шийдвэр гаргаж эхэлсэн. Халтмаагийн Баттулгаас эхлээд мах, талх, буудал гээд бүгдийг авсан. Дараа нь өөрөө улсын Ерөнхийлөгч болтлоо яваад нүүрс, төмөр зам, өөр юутай ч хутгалдсан юм. Женко гэдэг чинь "Загалмайлсан эцэг" кинон дээр гардаг мафийн компанийн нэр ш дээ. Одоо өөрөө киноныхоо гол баатар болсон ч нэг юмыг дутуу тооцсон. Бид хаант засаглалтай байх үедээ ч ард иргэд, газар ус, байгалийн баялгийнхаа ашиг сонирхлоос давсан хэнийг ч толгой дээрээ залж байгаагүй. Тухай тухай үед шийдвэр гаргаж байсан улстөрчдийн төлөөлөл болж томилогдсон хүмүүс Хөдөлмөрийн баатар гавъяат болтлоо шоконд оруулж, авлигынхаа төлөөсийг авч байсан. 

Төрийн шагнал, төрийн нэр хүндийг авлигын зэвсэг болгож байсан. Би өнгөрсөн онд чуулган хаалттай хуралдахад Эрдэнэс Тавантолгой чинь цөмийн бөмбөг болж тэсэрнэ ээ, нууцууд чинь ил болно гэж хэлж байсан. Жам ёсоороо л болж байна. Дахиж ийм асуудал гаргахгүйн тулд бид эрхзүйн шинэтгэл хийх ёстой. Энэ нь Төрийн болон орон нутгийн өмчийн тухай хууль. Энэ бол өмчөө эзэнтэй, харуултай, хяналттай, хариуцлагатай болгох зохицуулалт. Энэ хуулийг дэмжихгүй бол хулгайг үргэлжлүүлье гэсэн үг" гэлээ.

П.ГОО