Монгол Улсын Засгийн газраас өргөн барьж буй Эрүүгийн хуульд нэмэлт, өөрчлөлт оруулах тухай болон уг хуулийн төсөлтэй холбогдуулан боловсруулсан бусад хуулийн төслүүдийг хэлэлцэх эсэх асуудалтай холбогдуулан гишүүд асуулт асууж хариулт авч байна. 

Энэ үеэр УИХ-ын гишүүн Б.Пүрэвдорж "Эрүүгийн хэрэг хянан шийдвэрлэх тухай хуулийн 17 дугаар зүйлийн 1.8-д Хэрэг хялбаршуулахгүй гэсэн байна. Гэтэл 17.1.6-д гэм буруугаа хүлээсэн хүнд, гэмт хэргээ нотолсон хүнийг Эрүүгийн хуулийн 6.7 ял хөнгөрүүлэх заалт чинь хэвээрээ байх юм. Жишээ нь, Б.Ганхуяг гэдэг хүн шоронгоос тэгсэн тэгсэн гээд мэдүүлэг өглөө. Тэр хүний хэргийг хялбаршуулахгүй юм байна. Гэхдээ шүүх дээр очихоор нийтийн албан тушаалтан их хэмжээний хохирол учруулсан бол 2-8 жил гэж байна. Энэ хүн 6.7 заалтаар гэмт хэргээ нотлоод хохирлоо барагдуулсан бол тэнсэн харгалзах ялтай заалт явж байна. Хэдэн их наяд төгрөгөөр гэмт хэрэг үйлдэж, улс орныг тоночихоод жил суугаад гараад ирэх боломжийг энэ хууль чинь өгч байна" гэлээ. 

Үүнд Улсын дээд шүүхийн шүүгч Б.Батцэрэн  " Эрүүгийн хуулийн 7.1-д тэнсэх журмыг хуульчилсан. Тэнсэх журмыг 1-5 жилтэй хорих ялд хэрэглэж болдог. Үндсэн нөхцөл нь гэм буруугаа хүлээсэн, хохирлоо төлсөн, нөхөн төлөхөө илэрхийлсэн байх. 2-8 жил хорих ял оногдуулсан гэмт хэрэг дээр тэнсэх журмыг 6.7-д заасныг баримтлан хэрэглэх боломжгүй. Хялбаршуулсан журмаар прокурортой ялаа тохиролцоод ирж байгаа хэргийг шүүх шууд батлахгүй" гэсэн  хариултыг өглөө.

Мөн ХЗДХЯ-ны Төрийн нарийн бичгийн дарга П.Сайнзориг "Одоогийн яригдаад байгаа гэмт хэргүүд дээр тэнсэх боломж байхгүй" гэхэд Б.Пүрэвдорж гишүүн "22 дугаар зүйлийн 1.2-оор 1-5 байсан юм байна. Одоо энэ өөрчлөлтөөр 2-8 болгож байгаа юм байна. 6 дугаар зүйлийн 7.1.3 хамгийн бага ялаас 50-иас доошгүй гэхээр Б.Ганхуягт нэг жилийн ял өгөөд зургаан сар суугаад л гараад ирэх нь байна. Хууль шүүхийн бүгд хуулийн цоорхойгоор явуулна" гэж тодруулга хийлээ.

Энэ үеэр УИХ-ын даргын зүгээс "Шүүхээр гэм буруутай нь тогтоогдоогүй байхад танхимд ял оноогүй" гэдгийг сануулсан юм. Үүний дараа ХЗДХ-ийн сайд Х.Нямбаатар "Чуулганы индэр бол хэн нэгэн хүнийг ялладаг шүүхийн танхим биш. Авлигын хэрэг дээр хэрэг дээр хэрэглэхгүй гээд тодорхой хэлчихье. Чи юугаа мэддэг юм бэ" гэсэн юм. 

П.ГОО