АН-аас өнөөдөр /2022.12.15/ мэдээлэл хийлээ. УИХ-ын гишүүн Д.Ганбат “Залуус -30 хэмийн хүйтэнд 13 дахь өдрөө жагсаж байна. Монголын иргэд 10 жилийн амьдрал, ирээдүйгээ хулгайд алдсан. Ганцхан нүүрсний хулгайн асуудал биш. Шударга хуулийн байгууллагууд ажлаа хийх ёстой. Нэрийг нь зарласан 17 хүний талаар ярихгүй. Цаашид ч жинхэнэ хулгайчдыг зарлах байх.

Хөгжсөн, ардчилсан улсад хүмүүс өөрсдөө хариуцлагаа хүлээдэг. Халдашгүй эрхийн тухай заавал ярьдаггүй. Хамгийн томоосоо хариуцлага хүлээдэг.  УИХ-ын дарга, Ерөнхий сайд өөрсдөө ёс суртахуунтай байж, түдгэлзээд хамт шалгуулах ёстой.

Аж ахуйн асуудалтай холбогдсон Үндэсний аюулгүй байдлын зөвлөмжийг ил болгооч ээ. ҮАБЗ-д байсан нөхөд хариуцлага хүлээх ёстой. ЗГХЭГ-ын даргаар ажиллаж байсан үе үеийн сайд нар хариуцлага хүлээж, шалгуулах ёстой” гэсэн байр суурийг илэрхийллээ.  

Нүүрсний хулгайд холбогдсон эсэхийг тодруулсан сэтгүүлчийн асуултад тэрбээр "Би ямар ч холбоогүй. Хэрвээ би ямар нэг байдлаар холбогдвол тангараг өргөсөн УИХ-ын гишүүний хувиар түдгэлзээд, шууд очиж шалгуулна. Намайг шударга, айдасгүй цөөхөн гишүүдийн нэг гэдэг" гэсэн тайлбарыг өглөө.