Тавантолгой-Гашуунсухайт чиглэлийн төмөр замын төсөлтэй холбогдуулан Бодь Интернэшнл ХХК-иас мэдэгдэл гаргалаа. Тус мэдэгдлээс онцлох мэдээллийг хүргэж байна.

-Монгол Улсын эдийн засаг нийгэмд онцгой ач холбогдолтой энэхүү бүтээн байгуулалттай холбоотой үндсэн гэрээний гол нөхцөл болох үнийг мушгин гуйвуулж, олон нийтийг төөрөгдүүлэх, зөвхөн нэг талаас нь тайлбарлаж үндэслэлгүйгээр гүтгэх зэргээр Бодь Интернэшнл ХХК болон хамтран ажилласан 700 гаруй аж ахуйн нэгж, 15 000 инженер, техникийн ажилчдын нэр хүндэд халдаж, бүтээн байгуулалтад сөргөөр нөлөөлж байгаад харамсаж байна.

- Бодь Интернэшнл ХХК нь Тавантолгой-Гашуунсухайт чиглэлийн төмөр замын бүтээн байгуулалтын нийт 6 багц ажлыг 1.005.6 сая ам.долларт багтаан 30 сарын хугацаанд гүйцэтгэх гэрээг Тавантолгой төмөр зам ХХК-тай байгуулсан.

-Санхүүжүүлэгч тал болох Эрдэнэс Тавантолгой ХК ажлын төлбөрийг 60 сарын хугацаанд бэлэн мөнгө болон нүүрсээр төлөх нөхцөлтэй.

-Үндсэн гэрээний 6 багц ажлын нэг болох нэгдүгээр зэрэглэлийн 1 км төмөр замын гэрээний үнэ 1.46 сая ам.доллар бөгөөд нийт 324.51 км төмөр замын үнэ 474.2 сая ам.доллар юм.

-Төмөр замын барилга угсралтын ажил 100 хувь дуусаж, тээвэрлэлт эхэлсэн бөгөөд захиалагч, санхүүжүүлэгч талууд ажлын нийт төлбөрийн 58 хувийг гүйцэтгэгчид олгоод байна.

- Бодь Интернэшнл ХХК нь гэрээт ажлын төлбөрт авах нүүрсийг уурхайн ам нөхцөлөөр БНХАУ-ын худалдан авагч талд шууд нийлүүлдэг тул нүүрсний худалдаа, тээвэр, хадгалалт, экспортын үйл ажиллагаанд оролцдоггүй.

-Нүүрстэй холбоотой хууль бус, гэрээний бус үйл ажиллагаа явуулаагүй, аливаа давуу эрх эдлээгүй гэдгээ хариуцлагатайгаар мэдэгдэж байна.