Засгийн өнөөдрийн ээлжит хуралдаан эхэллээ. Өнөөдрийн хуралдаанаар нийгмийг бухимдалд автуулаад байгаа нүүрсний хулгайн асуудлыг шийдвэрлэх чухал хуулийг төслийг хэлэлцэнэ. 

Тодруулбал, авлига, албан тушаалын гэмт хэргийн ялын бодлогыг чангатгахаар болж буй.  Энэ хүрээнд Эрүүгийн хууль, Эрүүгийн хэрэг хянан шийдвэрлэх хуульд нэмэлт  өөрчлөлт оруулах асуудлыг өнөөдрийн Засгийн газрын хуралдаанаар оруулан хэлэлцүүлж, УИХ-д өргөн барих чиглэл барин ажиллаж байгаа. Ийнхүү ялын бодлого чангарахаас өмнө нүүрсний хэрэгт холбогдсон этгээдүүд хэргээ хүлээж, ялаа хөнгөрүүлэх замыг сонгох хүн ч байгааг эх сурвалжууд дурьдаж байна. 

АТГ газрын өгч байгаа мэдээллээр одоогоор  22 хэрэгт  мөрдөн шалгах ажиллагаа явуулж байна. Үүнээс долоо нь мөрдөн байцаалтын шатанд яваа аж. Түүнчлэн Мөрдөн ажиллагааны явцад 47 обьектод нэгжлэг явуулж 15 хүнийг баривчилж, 10 хүнийг цагдан хорьж, 35 хүнийг яллагдагчаар татсан тухай мэдээлсэн. Тус газраас өгсөн өөр нэг чухал мэдээлэл бол нэр бүхий 17 албан тушаалтнууд шууд болон шууд бусаар нүүрсний олборлолт, борлуулалт, тээвэрлэлт, төрийн өмчийн хөрөнгөөр бараа үйлчилгээ худалдан авахад оролцсныг зарласан. Тэгвэл энэ нэрс нь саатуулагдан шалгагдаж буй нэг л хүний мэдүүлэг дээр үндэслэгдсэн гэх мэдээлэл байна. Нэг үгээр цаашид хулгайч хулгайчаа зарлах үйл явц үргэлжилнэ гэсэн үг. Нүүрсний хулгайд холбоотой гэх олон хүний нэрийг өчигдөр АТГ дурьдаагүй өнгөрсөн. АТГ-ын дэд даргын хэлснээр мөрдөн шалгах ажиллагаа үргэлжилж буй. Тэгэхээр цаашид хэн нь хэнийгээ хуулийн өмнө дуудаж, илчлэх нь анхаарал татаж байна

П.ГОО