Хөгжлийн банкийг хянан шалгах УИХ-ын түр хороо хуралдаж байна. Өнөөдрийн хуралдаанд Хөгжлийн банкны асуудлыг шалгах ажилагаанд саад учруулж байгаа зарим байгууллагын төлөөллийг дуудсанаа түр хорооны дарга Б.Энхбаяр хэллээ. Энэ хүрээнд  Сангийн сайд Б.Жавхлан, Голомт банкны Ерөнхийлөгч Г.Ганболд, Чингис хаан банкны гүйцэтгэх захирал Э.Ганзориг нарыг дууджээ.

Түр хорооны дарга Б.Энхбаяр “Хөгжлийн банкинд өмнө хийгдсэн бүхий л шалгалтын материал, дүгнэлтийг албажуулж, түр хороонд ирүүлэх тогтоол гарсан. Монголбанкны Ерөнхийлөгч Б.Лхагвасүрэн, тухайн үеийн Сангийн сайд Ч.Хүрэлбаатар нарын хамтарсан удирдамжаар 2020 онд Хөгжлийн банкинд хийсэн хяналт шалгалтын материалыг ирүүлээгүй. Хоёр удаа нэхсэн.

Хамгийн сүүлд ирүүлсэн материалд шалгалтын материалыг Сангийн сайд албажуулаагүй байсан. Өнөөдрийн бидний ярьж байгаа Хөгжлийн банкны зөрчил, дутагдал албажуулаагүй шалгалтаар илэрсэн байна. Үүнийг тухайн үеийн Сангийн сайд Ч.Хүрэлбаатар эс үйлдлээр албажуулахгүй, нуун дарагдуулсан гэж үзэж байна. Монголбанкны Ерөнхийлөгч Б.Лхагвасүрэн хамтарсан шалгалтаа албажуулаад гарын үсэг зурсан байна. Гэтэл Сангийн сайд албажуулаагүй, Засгийн газарт энэ талаар танилцуулаагүй байна. Ямар учиртай талаар тайлбар авахаар Сангийн сайд Б.Жавхланг дуудсан. Тайлбар өгөөч” гэв.

Сангийн сайд Б.Жавхлан: Б.Энхбаяр гишүүн болсон процессыг дурдлаа. Манайхаас материал нэхсэний дагуу 2022 оны 11 дүгээр сарын 10-нд шалгалтын материалыг иж бүрнээр нь ирүүлсэн.

Түр хорооны дарга Б.Энхбаяр: Хөгжлийн банкинд 2020 онд хийсэн Монголбанк, Сангийн яамны хамтарсан шалгалтын дүнг албажуулахгүй, нуун дарагдуулж, эс үйлдэл гаргасан нь албан тушаалын гэмт хэргийн шинжтэй гэж үзвэл Сангийн сайд асан Ч.Хүрэлбаатарыг хууль хяналтын байгууллагаар шалгуулна. Мөн нээлттэй сонсголын үеэр Ч.Хүрэлбаатар сайдыг гэрчээр дуудан байцааж, асууна гэсэн байр суурийг илэрхийллээ.

Б.Хэрлэн